नवलपुरमा सवारी दुर्घटना न्युनिकरणकालागी चालकको स्वास्थ्य परिक्षण

कावासोती । जिल्ला ट्राफिक प्रहरी कार्यालय नवलपुरले आज ( बुधबार) देखि सार्वजनिक सवारी चालकहरुको स्वास्थ्य परिक्षण सुरु गरेको छ । नवलपुरको स्थानिय स्वास्थ्य संस्थाहरुको सहयोगमा नवलपुर ट्राफिकले सवारी चालकहरुको स्वास्थ्य परिक्षण शुरु गरेको हो । ट्राफिक प्रहरीले साताको दुई दिन सडकमा नै सवारी चालकको स्वास्थ्य परिक्षण गरिने जिल्ला ट्राफिक प्रहरी कार्यालय नवलपुरका हवल्दार पदम बडुले बताए ।

सुनवलका याम बहादुर थापाले पनि सवारी चलाउन शुरु गरेदेखि आफ्नो स्वास्थ्य जाँच गराउन खासै ध्यान दिएका रहेनछन् सोही अवसरमा उनले पनि स्वास्थ्य परिक्षण गराउँदा ब्लड प्रेसर हाई भएको थाहा पाए । शिविरमा जाँच गराउँदा प्रेसर हाई भएको बताउँदै स्वास्थ्यकर्मीले उनलाई खानपानमा समेत ध्यान दिनु पर्ने बताए पछि उनि फर्किए ।उनले सवारी चालकहरूलाई मध्यनजर गर्दै यस्तो कार्यक्रम गरेकोमा आयोजक ट्राफिक प्रहरीलाई धन्यवाद समेत दिएका थिए । उनले यस्ता शिविरहरू केही समयको अन्तरालमा फेरी पनि राख्दा राम्रो हुने सुझाव पनि दिएका छन् । यस्तै अर्का सवारी चालक लाल बहादुर श्रेष्ठले पनि शिविरमा आखाँ जाँच गराउँदा चश्मा लाउनुपर्ने अवस्था भई सकेको थाहा पाए । लामो समयदेखि स्वास्थ्य जाँच नगराएका उनले संचालित कार्यक्रमबाट निशुल्क स्वास्थ्य परिक्षण गर्नुका साथै परामर्श समेत लिएर त्यहाँबाट फर्किए । उनिहरू जस्तै नवलपुर जिल्ला भएर सवारी चलाउने एक सय २० जना सवारी चालकहरूले बुधबार निशुल्क स्वास्थ्य परिक्षण गराएका छन् ।

बढदो सवारी दुर्घटना न्युनिकरणका लागि नवलपुरमा चालकहरुलाई निःशुल्क स्वास्थ्य परिक्षण संचालन गरिएको जिल्ला ट्राफिक प्रहरी कार्यालय नवलपुरका प्रमुख प्रहरी निरिक्षक युवराज भण्डारीले जानकारी दिए । स्वास्थ्य परिक्षणबाट जिल्लामा बढ्दो सवारी दुर्घटना न्युनिकरण गर्ने सहयोग पुग्ने भण्डारीले बताएका छन् । नवलपुरमा सवारी दुर्घटना बढिरहँदा प्रहरीले चालकको स्वास्थ्य परीक्षण सडकमै गराउन थालेको हो । यसले चालकलाई रिफ्रेस पनि हुने स्वास्थ्य अवस्थाको जानकारी पनि हुने भएकाले सडकमै परीक्षण गरिएको ट्राफिक प्रहरीले जनाएको छ । राजमार्गमा दैनिकजसो सवारी दुर्घटना हुन थालेपछि ट्राफिक प्रहरीले विकल्पको रुपमा यस्तो कार्यक्रम अघि सारेको जिल्ला ट्राफिक प्रहरी कार्यालय नवलपुरका प्रमुख प्रहरी निरिक्षक युवराज भण्डारीले बताए ।