इन्टरनेट बाट हुने हिंसा न्युनिकरणमा किशोरीहरुद्धारा सचेतना कार्यसुरु

दलदले । पछिल्लो पटक बालबालिकाहरु, किशोरकिशोरीहरु र महिला एवम पुरुषहरुमाथी हुने हिंसाका घटनाहरु बृद्धी भईराखेको छ । यस्ता हिंसाका घटनाहरु मध्ये अनलाईन वा इन्टरनेटबाट हुन सक्ने हिंसाको बारेमा स्थानीय स्तरका किशोरकिशोरीहरुलाई स्वयम किशोरकिशोरीहरुबाट नै तालिम र अभिमुखीकरण कार्यक्रम देवचुली नगरपालिकामा सुरु गरिएको छ ।
जागृति बाल तथा युवा सरोकार नेपालले कन्नालन स्विजरल्याण्डको सहयोगमा सञ्चालन गरेको किशोरी शसक्तिकरण कार्यक्रम अन्तगर्तका किशोरी अभियन्ताहरुलाई प्रशिक्षण प्रदान गरी उनीहरुको माध्यमबाट विद्यालय र स्थानीय स्तरका किशोरकिशोरीहरुलाई अनुशिक्षण र छलफल कार्यक्रमको आयोजना सुरु गरिएको कुरा जागृति बाल तथा युवा सरोकार नेपालका दिपक शर्माले बताउनुभयो । पछिल्लो पटक इन्टरनेट र मोवाईलबाट बिभिन्न हिंसाका घटनाहरु किशोरकिशोरीहरुमा बढेको तथ्याँक जिल्ला प्रहरी कार्यालय र अन्य निकायहरुबाट सुनिन थाले पछी यो अभियानहरु सुरु गरिएको कुरा शर्माले बताउनुभयो । आज देवचुली ५ कदमपुर सकला माध्यमिक विद्यालयमा विद्यार्थीहरुलाई साईवर सुरक्षा र यसबाट हुन सक्ने हिंसाको अवस्थाहरुको बारेमा अभिमुखीकरण कार्यक्रम राखीएको थियो ।
नेपालमा साईबर सुरक्षा अन्तर्गतका सम्पूर्ण मुद्धाहरु काठमाण्डौबाट नै सम्पादन हुने भएकोले समेत सर्वसाधारणहरुले निकै कम मात्र मुद्धा र जानकारी जिल्ला स्तरका निकायहरुमा कम नै आउन थालेको कुरा सम्बन्धित निकायहरुले बताए । सामाजिक सञ्जालको प्रयोगले र इन्टरनेटको प्रयोग गर्दा कहिले कहिले आफै बिभिन्न साईटहरु खुल्ने र अलि ठुला व्यक्तिहरुले समेत यसको दुरुपयोग गरेकोले समेत किशोरकिशोरीहरुमा हिंसाका घटनाहरु यसबाट हुन थालेको छ ।
माध्यमिक विद्यालयस्तरमा अनिबार्य रुपमा कम्प्युटर शिक्षा र इन्टरनेटबाट नै बिभिन्न जानकारीहरु समेत प्राप्त गर्न सकीने बहानामा समेत धेरै विद्यार्थीहरुले अभिभावहरुलाई करकापमा नै पारी ल्यापटप, मोवाईल र वाईफाईको समेत माग गर्ने गरेको कुरा अभिभावकहरुले समेत बताएका छन् । कार्यक्रमको पहिलो चरण अन्तर्गत देवचुलीका सामुदायिक माध्यमिक विद्यालयका किशोरकिशोरीहरुसँगको छलफल र अन्तरक्रिया कार्यक्रम सञ्चालन गर्ने र एकखालको अध्ययन अनुसन्धान पश्चात अन्य कार्यक्रहरुको तय गरिने कुरा दिपक शर्माले बताउनुभयो ।