यस्तो छ १ वर्षमा गण्डकी सरकारको १२७ उपलब्धि

पोखरा : गण्डकी प्रदेश सरकारले शनिबार प्रदेश दिवस मनाउँदैछ । सरकार गठन भएको दिनको अवसरलाई नै प्रदेश दिवस घोषणा गरिएको छ । यस अवसरमा शनिबार प्रदेश सरकारले गएको १ वर्षमा गरेका १२७ बुँदे उपलब्धि सार्वजनिक गर्दैछ। माघ २८ गते प्रदेशसभामा तत्कालीन एमालेका संसदीय दलको नेता चुनिएपछि पृथ्वीसुब्बा गुरुङले फागुन ४ गते प्रमुख बाबुराम कुँवरबाट मुख्यमन्त्रीको सपथ लिएका थिए ।

गोरखाबाट निर्वाचित रामशरण बस्नेतलाई उद्योग, पर्यटन, वन तथा वातावरण मन्त्रालयको जिम्मेवारी दिएर २ सदस्यीय मन्त्रिमन्डल बनाएका उनले सोही दिन मन्त्रिपरिषदको बैठक राखेका थिए ।

मन्त्रिपरिषदको पहिलो बैठकले नै दीर्घकालीन लक्ष्यसहितका महत्वपूर्ण योजनासम्बन्धी निर्णय गरेको थियो । त्यसमध्ये २ वर्षभित्र प्रदेशभरि बिजुली र आधारभूत खानेपानी पुर्‍याउने निर्णय पनि थिए । प्रदेश सरकारले ती योजना पूरा गर्न बिजुली नपुगेका ठाउँ पहिचान गरि भ्याएको जनाएको छ । खानेपानीका ५ सय ५२ भन्दा आयोजनाको सम्झौता भइसकेको पनि उसको भनाइ छ ।
सरकारले अन्तर्राष्ट्रिय सम्मेलन केन्द्र, अन्तर्राष्ट्रियस्तरको खेल स्टेडियम निर्माण गर्न विदेशीदाता खोजिरहेको छ । क्यान्सर, मुटु तथा मृर्गौला उपचार केन्द्र स्थापना गर्नेबारे सरकार अध्ययनको चरणमा छ ।

मुख्यमन्त्री पृथ्वीसुब्बा गुरुङ पहिलो वर्ष कानुन निर्माणको वर्ष भएको बताउँछन् । ‘कानुन बनाएका छौं, प्रदेश विकासको आधार तयार गरेका छौं’, उनले अन्नपूर्णसँग भने, ‘कार्यालयहरु, प्रदेशसभा, मन्त्रालयहरु लगायतको भौतिक पूर्वाधारको व्यवस्था पनि यो १ वर्षमा भएको छ ।’

प्रदेश सरकारको १२७ बुँदे उपलब्धीको १ नम्बरमा प्रदेश सरकार गठन भएकै दिन प्रदेश सरकारको कार्य सञ्चालनलाई व्यवस्थित गर्न प्रदेश सरकार  कार्य  सम्पादन नियमावली,  २०७४ र प्रदेश सरकार  कार्य  विभाजन   नियमावली, २०७४ स्वीकृत गरी लागु गरिएको उल्लेख छ ।

भने २ नम्बरमा सरकारले प्रदेश सभामार्फत २१ वटाभन्दा बेसी कानुन निर्माण गरिसकेको उल्लेख छ । ‘४ कानुन सभामा छलफलका क्रममा छन् । १ सय १७ वटा कार्यविधि÷निर्देशिका स्वीकृत भएका छन्,’ उपलब्धि पुस्तिकमा भनिएको छ । चौथों बुँदामा सरकारले राजधानी निर्धारण र प्रदेशलाई गण्डकी नामकरण गरिएको भनेर उल्लेख गरेको छ ।

आर्थिक मामिला तथा योजना मन्त्री किरण गुरुङ आर्थिक वर्षको अन्त्यसम्म बजेट कार्यान्वयन ७० प्रतिशतभन्दा बेसी हुने बताउँछन् । प्रतिपक्ष दल नेपाली कांग्रेसका सांसद कुमार खड्का अरु कुरामा धैर्य हुन सकिए पनि बजेट कार्यान्वयनमा सरकारबाट अपेक्षाकृत कार्य हुन नसकेको बताउँछन् ।

६० जना प्रदेशसभा सदस्य रहेको गण्डकीमा पार्टी एकीकरणअघि नै तत्कालीन एमाले र माओवादी केन्द्रले गठबन्धन सरकार बनाएका थिए । ती पार्टी नेकपा बनिसक्दा सत्तारुढ दलसँग ३७ सांसद छन् । प्रतिपक्ष कांग्रेस १५ जनासहित प्रदेश सभामा उपस्थित छ । राजमोका २ र नयाँ शक्तिका २ सांसद छन् । एक स्वतन्त्र सांसद छन् । राजमोका १ सांसदको पुस ६ गते निधन भएपछि बागलुङ २ को ख निर्वाचन क्षेत्र रिक्त छ ।

annapurnapost.comमा समाचार छ

यस्ता छन् गण्डकी सरकारका १२७ बुँदे उपलब्धी

Gandaki-Provine-1 year-book