बाल विवाह न्युनिकरणका लागि देवचुलीमा विद्यालय शिक्षा कार्यक्रम

कावासोती । देवचुली नगरपालिका नेपालको दोस्रो र गण्डकी प्रदेशको पहिलो बालमैत्री नगरको रुपमा बाल दिवसको दिन पारेर घोषणा भएको हो । बालमैत्री नगर हुनका लागि आवश्यक पर्ने सुचकहरुमा बाल विवाह र बालश्रम न्युनिकरण निकै नै चुनौतीको रुपमा रहेको र सो कुराको दिगो रुपमा समाधानको लागि समेत विद्यालयस्तरमा र समुदायस्तरमा सचेतनामुलक कार्यक्रमहरु नगरपालिकाको तर्फबाट सुरु गरिएको छ । बहुक्षेत्रिय पोषण कार्यक्रम अन्तर्गत नगरको शिक्षा शाखासँगको समन्वयमा सो कार्यक्रम सुरु भएको देवचुली नगरका शिक्षा शाखा प्रमुख मोतिप्रसाद रिजालले बताए । नगरको १६ माध्यमिक तहका विद्यालयहरुमा सहजकर्ताहरुको परिचालन गरी कार्यक्रम सञ्चालन गर्न लागिएको कुरा रिजालले बताए ।
नेपाल बाल विवाह हुने देशमा दक्षिण एसियामा नै अग्रणी अवस्थामा रहेको छ । नेपालको संविधान २०७२ ले बाल अधिकारलाई मौलिक हकमा समावेश गरी बालविवाह लाई कानुन विपरितको कार्यमा समावेश गरिएको छ । नेपालको अहिलेको कानुन अनुसार विवाहको उमेर २० वर्ष तोकिएको छ ।
कार्यक्रम अन्तर्गत आजबाट विद्यालयस्तरमा सचेतनामुलक कार्यक्रमहरु सुरु गरिएको कुरा पोषण सहजकर्ता विद्या पौडेलले बताईन् । किशोरकिशोरीमा हुन सक्ने विभिन्न परिवर्तनहरुलाई न्युनिकरण गर्नको लागि विद्यार्थीहरु स्वयमलाई सञ्चालन गर्ने यस्तो खालको कार्यक्रमले प्रभावकारी सन्देश दिने कुरा बालअधिकार कर्मी दिपक शर्मा बताए । पछिल्लो पटक आफैले गर्ने विवाहको दर उच्च भएकोले समेत यसरी स्वयम उनिहरुमा आधारित सचेतनामुलक कार्यक्रम सुरु हुनुले सकरात्मक प्रभाव पार्ने कुरा उनले बताए । कार्यक्रम अन्तर्गत बालविवाहको अवस्था, कानुनी प्रावधानहरु, नेपालको संविधान, बाल अधिकार र व्यक्तिगत प्रतिबद्धताहरु जाहेर गर्ने जस्ता विषयहरु समावेश गरिएको र आज पहिलो दिन भिमसेन माध्यमिक विद्यालय र अमर ई। स्कुलमा सचेतनामुलक कार्यक्रम सञ्चालन गरिएको कुरा बालमैत्री परामर्शदाता नारायण पौडेलले बताए ।