बुलिङटार गाँउपालिका अध्यक्ष बस्ताकोटीको मनपरी/ प्रमुख प्रशासकिय अधिकृतसहित ३ कर्मचारी लखेटिए

कावासोती । बुलिङटार गाँउपालिकाका अध्यक्ष शशि किरण बस्ताकोटीले ३ कर्मचारिहरुलाई लखेटेका छन् । आफुले भने अनुसारको काम नगरेको भन्दै गाँउपालिकामा कार्यरत प्रमुख प्रशासकिय अधिकृतसहित ३ जनालाई लखेटेका हुन् । गत बिहिबार देखि कार्यालयबाट लखेटिनेहरुमा गाँउपालिकाका प्रमुख प्रशासकिय अधिकृत बालकृष्ण अधिकारी, लेखापाल रघु काफ्ले र इन्जिनियर संजय कुमाल छन् ।
प्रमुख प्रशासकिय अधिकृत अधिकारीका अनुसार स्थानिय तहमा भएका नदिजन्य पदार्थ ठेक्का टेण्डरमा लैजाने कुरामा नै गाँउपालिकाका अध्यक्षको चित्त नबुझेको हो । उनले टेण्डर गरीसकेपछि पनि गाँउपालिकाका अध्यक्ष आफैले नै खोलामा ट्रयाक्टर हाल्न लगाउने गरेपछि प्रहरी प्रशासन लगाएईको तर प्रहरी प्रशासनले समेत नियन्त्रण गर्न नसकेपछि आफै खोलामा पुगी जवरजस्ती नदीजन्य पदार्थ निकासी गर्ने ढुवानीको साधन नियन्त्रणमा लिइएको बताए ।
गाँउपालिकाका अध्यक्ष बस्ताकोटीले यहाँ जनप्रतिनिधिको राज चल्छ , कर्मचारीको राज चल्दैन , जनता उठाएर लखेटिन्छ भनेर धम्कि दिएपछि ज्यान जोगाउन आफुहरु कार्यालयमा बस्न नसकेको प्रमुख प्रशासकिय अधिकृत अधिकारीले बताए । प्रमुख प्रशासकिय अधिकारीले आज नवलपुरका प्रमुख जिल्ला अधिकारी दिपक राज नेपाललाई जानकारी गराएर मन्त्रालय हाजीर हुन जान लागेको बताए । बुलिङ्गटार गाँउपालिकाका अध्यक्ष बस्ताकोटीले भने उनिहरुले जनताको काम नगरेको दावी गर्दै आएका छन् ।