सहकारी दिवस नवलपुरमा पनि मनाईयो / सहकारी ऐन संशोधनको तयारी भैरहेको छ : साँसद महत

बिजय चालिसे
कावासोती । ६२ औँ सहकारी दिवस बुधवार नवलपुरमा पनि विभिन्न कार्यक्रम गरि मनाईएको छ । ‘दिगो विकास लक्ष्य प्राप्तिको लागि सहकारी’ भन्ने मुल नारा सहित राष्ट्रिय सहकारी दिवस नवलपुरमा पनि मनाईएको हो ।
दिवसका अवसरमा जिल्लाको सदरमुकाममा कावासोती नगरपालिकाको आयोजनामा गण्डकी प्रदेश स्तरिय वक्तृत्वकला प्रतियोगिता, नगर स्तरिय अन्तर सहकारी हाजिरी जवाफ प्रतियोगिता, नगर स्तरिय उत्कृष्ट सहकारी सम्मान एवं प्रोत्साहन, सहकारी कर्मचारी समाज नवलपुरका सस्थापकहरलाई सम्मान लगायतका कार्यक्रम गरि मनाईएको हो । नगर प्रमुख चन्द्रा कुमारी पुनको अध्यक्षतामा भएको कार्यक्रमको प्रमुख अतिथि प्रतिनिधि सभा सदस्य एवं नेकपाका केन्द्रिय सदस्य तिलक महत रहनुभएको छ ।
कार्यक्रममा शुभकामना मन्तव्य राख्दै प्रमुख अतिथि महतले सहकारी सम्बन्धी ऐन संशोधनको तयारी भैरहेको बताउनुभयो । उहाले लाखौ बेरोजगारहरुलाई उधमशिल बनाउन र सहकारी मार्फत उधोग धन्दा तर्फ आकर्शित गराउने गरि ऐन संशोधन गर्न लागिएको जानकारी दिनुभयो । कार्यक्रममा अधिकांस महिलाहरु उपस्थिती रहेको भन्दै साँसद महतले महिलाहरुले चलाएका सहकारी निष्ठावान हुने बताउनुभयो । बंगलादेशमा महिलाहरुले चलाएको सहकारीको उदाहरण दिदै साँसद महतले महिलाहरुले चलाएका सहकारीहरु धेरै अगाडी बढेको स्मरण गराउनुभयो । गरिब, अशाहय एंव पिछडिएका समुदायलाई सहकारीले ठुलो योगदान दिन सक्ने भन्दै त्यतर्फ सहकारी संस्थाहरु क्रियासिल हुनुपर्नेमा जोड दिनुभयो ।
फरक प्रशंगमा साँसद महतले विकास निर्माणका काममा नवलपुरको २ नंबर क्षेत्रले फड्को मारेको दावी गर्नुभयो । अघिल्लो महिना मात्रै कावासोतीमा रहेको मध्यविन्दु अस्पताललाई जिल्ला अस्पतालको रुपमा घोषणा गरिनु ठुलो उपलब्धि भएको बताउनुभयो । उहाले विकास निर्माणका काममा भाजो हाल्न खोज्ने केहि तत्वहरु रहेपनि त्यसलाई चिर्दै समग्र नवलपुरको विकासमा आफु कहि कतै नचुक्ने स्पष्ट पार्नुभयो । उहाले आगामी बैशाख ३ गते जिल्ला सदरमुकाम कावासोती वडा नंबर ३ मा रहेको जग्गामा सरकारी कार्यालय व्यबस्थापनका लागि शिलन्यास हुने जानकारी पनि दिनुभयो । ३ गते प्रधानमन्त्री केपी शर्मा ओली, गण्डकी प्रदेशका मुख्य मन्त्री पृथ्वी सुब्बा गुरुङलगायतको आतिथ्यतामा भव्य शिलन्यास कार्यक्रको आयोजना गरिएको बताउनुभयो । सो कार्यक्रममा सबैलाई उपस्थिती जनाउन पनि उहाले आग्रह गर्नुभएको छ । अहिले यत्र तत्र छरिएर रहेका सरकारी कार्यालयबाट सेवा लिन आम सर्वसाधारणलाई केहि असहज भएकाले अब एउटै कम्पाउण्डबाट सबै सरकारी सेवा प्रवाह गरिने उहाको भनाई छ ।