नवलपुर ट्राफिकको सक्रियता : जोखिमपूर्ण यात्रा नरोकीएपछि सवारीका ‘हुट’ हटाइँदै

कावासोती । पूर्बि नवलपरासीको पहाडी क्षेत्रमा चल्ने सवारीमा जोखिमपूर्ण यात्रा नरोएपछि जिल्ला ट्राफिक प्रहरी कार्यालय नवलपुरले हुट (क्यारियर) हटाउन थालिएको छ । आईतबार देखि नवलपुरमा अनाधिकृत रुपमा सवारीसाधनमा जडान गरिएका हुट (क्यारियर) हटाउन थालिएको हो । यात्रुसहित बढी भारयुक्त सामान बोक्दा सवारी दुर्घटना हुनसक्ने भन्दै नवलपुर ट्राफिक प्रहरीले सामान राख्ने हुट नै हटाएको हो । सवारी तथा यातायात व्यवस्था नियमावली, २०५४ को मापदण्ड मिचेर बस, जिप, पिकअप लगायतका सवारीमा जडित हुट हटाउनलागेको हो ।

ट्राफिक कार्यालय नवलपुरका अनुसार हाल सम्म ७ वटा पिकअप भ्यानका हुट हटाएको छ । पटक – पटक हुटमा यात्रु नराख्न अनुरोध गर्दा समेत यात्रु राख्न नछाडेपछि सवारीको हुटनै हटाईएको जिल्ला ट्राफिक प्रहरी कार्यालय नवलपुरका प्रमुख मुनेन्द्र थापाले बताएका छन् । जिल्लाको पहाडी क्षेत्रमा चल्ने सबै सवारीको हुट हटाईने ट्राफिक प्रमुख थापाले बताए । बस व्यवसायी समिति, जिप व्यवसायी समितिलाई परिपत्र गरेर मापदण्ड कायम राख्न भनेपनि व्यवसायीले अटेरी गरेपछि ट्राफिकले नै हुट हटाउन सुरु गरेको हो । केही यात्रु बोक्ने जिपका हुट हटाइएको र केही दिनभित्र सबै हटाइसक्ने जिल्ला ट्राफिक प्रहरी प्रमुख मुनेन्द्र थापाले बताए । नवलपुरको पहाडी क्षेत्रमा चल्ने केही जिपका हुट हटाउन सुरु गरिएको ट्राफिक प्रमुख थापाको भनाई छ । “सबै समिति र सवारीधनीलाई पनि आग्रह गरेका छौँ, सबैले कानुनी मापदण्ड पूरा गरेर मात्र सवारी चलाउन पर्छ ”–प्रमुख थापाले भने ।

बढ्दो दुर्घटना न्यूनिकरणका लागि भन्दै जिल्ला ट्राफिक कार्यालयले नवलपुर जिल्लाभर अभियाननै संचालन गरेर सवारी साधनको हुट हटाउन सुरु गरेको हो । यात्रु कोचाकोच गरेर जीपले ओसार पसार गर्दा उकाली ओराली परेका गाउँघरका कच्ची ग्रामिण सडकमा दुर्घटनाको जोखिम बढीे हुने र हुट हटाउन थालेपछि दुर्घटनाको त्रास घटेको यात्रुहरुले बताएका छन् ।
नवलपुरको डेढगाँउ , बुलिङटार , हुप्सेकोट गाँउपालिकाको पहाडी क्षेत्र , मध्यबिन्दु नगरपालीकाको पहाडी क्षेत्र र बिनयीत्रिबेणी गाँउपालीकाको पहाडी क्षेत्रमा चल्ने सवारीहरुले अनुमति भन्दा अधिक यात्रुलाई जोखिम पुर्ण यात्रा गराउदै आएका छन् । पहाडी क्षेत्रमा चल्ने जिप, भ्यानको हुट हटाउनुलाई नवलपुर लेकबेसी यातायत प्रालिले पनि स्वागत गरेको अध्यक्ष युवराज बस्यालले बताए । “कानुनअनुसार मापदण्ड कायम गरेर मात्र सवारीसाधन चलाउन व्यवसायीलाई निर्देशन दिएका छौँ, अध्यक्ष बस्यालले भने ––“यो व्यवसायी, यात्रु सबैको हितमा छ, यसको कार्यान्वयन हुनैपर्छ ।” गाउँगाउँमा चल्ने जिप बसले क्षमताभन्दा बढी यात्रु बोक्ने त्यसैमाथि भार थप्ने गरी सामान ओसार्दा सवारी दुर्घटना बढेको प्रहरीको ठहर छ । यसलाई रोक्न नवलपुर ट्राफिकले नियमित चेकजाँच समेत गर्ने ट्राफिक प्रहरीले जनाएको छ ।