दाउन्ने सडक दुईतर्फी सञ्चालन

तिर्थराज डुम्रे
चोरमारा । पूर्वपश्चिम महेन्द्र राजमार्गको दाउन्ने खण्डमा गएको पहिरो हटाउने काम सकिएपछि राजमार्ग पूर्णरुपमा सञ्चालनमा आएको छ ।
सोमबार दिउसो साढे चार बजेबाट राजमार्ग दुईतर्फी सञ्चालनमा आएको हो । पाँच दिन अगाडी दाउन्नेमा पहिरो जादाँ राजमार्ग अवरुद्ध भएको थियो । केही स्थानको पहिरो हटाएर एकतर्फी राजमार्ग सञ्चालन गर्दै आएकोमा आजबाट दुईतर्फी नै सबारी सञ्चालनमा आएको इलाका प्रहरी कार्यालय दुम्किबासका प्रहरी निरीक्षक (इन्स्पेक्टर) बिकास बमले बताउनुभयो ।
अविरल वर्षपछि असोज ७ गते बुधबार राती दाउन्नेको विश्वकर्मा बाबा मन्दिर नजिक पहिरो खस्दा राजमार्ग पूर्णरुपमा अवरुद्ध भएको थियो । बुधबार र बिहिबार परेको वर्षाले दाउन्ने खण्डको बिभिन्न स्थानमा पहिरो खस्दा राजमार्गमा सवारी सञ्चालनमा समस्या भएको थियो । पश्चिम तर्फबाट आउने हजारौं यात्रुहरु बर्दघाट चिसापानी र पूर्वबाट जाने यात्रुहरु दुम्किबास अरुणखोला क्षेत्रमा अलपत्र परेका थिए । बिहिबारबाट नै राजमार्ग एकतर्फी सञ्चालन गरिएको भएपनि ठाउँठाउँमा पहिरो खस्दा नियमित सवारी सञ्चालनमा समस्या हुदै आएको थियो ।
आज राजमार्गको सबै पहिरो हटाउने काम सकिएपछि राजमार्ग पूर्णरुपमा सञ्चालनमा आएको हो । पहिरोले केही दिन अगाडी दाउन्नेमा बगाएको गाडी समेत आज निकाल्ने काम सकिएको इन्स्पेक्टर बमले बताउनुभयो ।
पहिरोको कारण जाममा परेका यात्रुहरुले १५ किलोमिटर दाउन्ने खण्डको दुरी पार गर्न १७ घण्टा सम्म समय लागेको बताएका थिए । अहिले राजमार्ग दुई तर्फी सञ्चालनमा आएपछि क्रमिक रुपमा दुम्किबास र बर्दघाटमा रोक्किएका सवारीहरु गन्तव्य तर्फ प्रस्थान गर्न थालेका छन् । लामो जाम रहेको कारण सामान्य अवस्थामा सवारी सञ्चालन आज राती सम्ममा हुन सक्ने अनुमान रहेको छ ।
दुईतर्फी सवारी सञ्चालन हुदा एक सवारीले अर्को सवारी उछिन्न खोज्दा फेरी जाम लाग्न सक्ने भएकाले राजमार्गको दुई तर्फको क्षेत्रमा नेपाल प्रहरी र ट्राफिक प्रहरी परिचालन भएको उहाँले बताउनुभयो ।
दाउन्ने खण्डमा पहिरो हटाएर तत्काल सवारी दुईतर्फी सञ्चालन भएपनि राजमार्गमा रहेका हिलो र धुलोको कारण यात्रुहरुले सास्ती खेप्नु परेको बताएका छन् । त्यस्तै राजमार्गको सो खण्डमा पहिरो जोखिम उच्च रहेका भन्दै हुन सक्ने अवरोधलाई हटाउन पूर्व तयारी अवस्था रहनुपर्ने उनिहरुको भनाईछ ।