कावासोती नगरपालिकाले किसानलाई दियो ५० प्रतिशत अनुदानमा कृषि – यन्त्र

खगेन्द्र पराजुली

कावासाेति । नवलपुरको कावासोती नगरपालिकाले कृषीलाई यान्त्रीकरण गर्ने उदेश्यले सहयोगी सामग्री हस्तान्तरण गरेको छ । नगरपालिकाभित्रका २ वटा कृषक समुह र १५ जना साना कृषि ब्यवसायीलाई बुधवार एक कार्यक्रमकाबीच सामग्री हस्तान्तरण भएको हो ।

नगरपालिकाको ५० प्रतिसत अनुदान र लाभग्राही कृषकको ५० प्रतिसत लागत साझेदारीमा १७ वटा कृषि प्रयोजनका बिभिन्न यान्त्रिक औजारहरु बितरण भएको हो ।

कावासोती नगरपालिकाको कृषि तथा पशुपंक्षी शाखाको कार्यालयमा भएको सामग्री हस्तान्तरण कार्यक्रममा १० वटा घाँस छाँटी काट्ने चापकटर मेसिन, २ वटा मिनी टिलर (हाते ट्याक्टर), ३ वटा माछापोखरीमा माछाका लागी अक्सिजन पुर्ति गर्ने एरिएटर दर्ता भै सञ्चालनमा आएका ब्यवसायिक फर्मका सञ्चालक र २ वटा धान काट्ने रिपर हाते ट्याक्टर सहितको मेसिन बितरण गरिएको पशु बिकास अधिकृत एवं कृषि तथा पशुपंक्षी शाखा कावासोतीका प्रमुख डा. टेकराज पौडेलले बताए ।

कावासोती नगरपालिकाका आर्थिक बिकास समितिका संयोजक एवं वडा नं. २ का वडाध्यक्ष लक्ष्मीप्रसाद पौडेलको अध्यक्षतामा भएको सामग्री हस्तान्तरण कार्यक्रममा प्रमुख अतिथि रहेका प्रमुख प्रशासकीय अधिकृत यज्ञ पुरीले परम्परागत र जिविकोपार्जनमा मात्र केन्द्रित हुनुभन्दा कृषिमा यान्त्रीकरणको अधिकतम् उपयोग गर्दै कृषकलाई ब्यवसायिक बनाउने नगरपालिकाको उदेश्यमा कृषकले लगनशीलताका साथ लक्ष्यप्राप्ति गर्न आग्रह गरेका छन् ।

नगरपालिकाले बितरण गरेको सामग्रीमध्ये चापकटर ५ लाख, एरिएटर २ लाख, रिपर ४ लाख ६० हजार, मिनी टिलर १ लाख ७३ हजार ५ सय गरि कुल १३ लाख ३३ हजार ५ सय रुपैंयामा नगरपालिकाको ५० र लाभग्राहीको ५० प्रतिसत साझेदारी रहेको शाखा प्रमुख पौंडेलले बताए ।