टरुवा ताल पर्यटकीय क्षेत्रका रुपमा विकास गरिने / कावासोती नगरपालिका र मन्त्रालय बीच ७ करोडको साझेदारी
नमुना पोष्टप्रकाशित मिति: २०७७ माघ २९, बिहिबार (४ साल अघि)
Advertisement
दयाराम आचार्य
कावासोती। कावासोती नगरपालिका स्थित टरुवा ताललाई पर्यटकीय क्षेत्रको रुपमा विकास गर्न रु. ७ करोडको लागतमा कार्यक्रम गरिने भएको छ । कावासोती नगरपालिका र संस्कृति,पर्यटन तथा नागरिक उड्यन मन्त्रालयको साझेदारीमा यती धेरै बजेट साझेदारीमा टरुवाताललाई पर्यटकीय क्षेत्रका रुपमा विकास गर्न लागिएको हो । पर्यटन पूर्वाधार निर्माण तथा पर्यटन उपज विकास साझेदारी कार्यक्रम अन्र्तगत रु. ७ करोड बराबरको काम गर्न लागिएको कावासोती नगरपालिका प्रमुख चन्द्र कुमारी पुनले बताउनुभयो ।
कावासोती नगरपालिका वडा नम्बर ७ र ८ अन्र्तगत टरुवा ताल तथा सिद्धेश्वर क्षेत्र समेटर पर्यटकीय विकासमा कार्यक्रम गरिने छ । नगरपालिकाकै मत्वपूर्ण पर्यटकीय क्षेत्रको सम्भावनाको रुपमा रहेको टरुवा ताल सहितको क्षेत्रमा आवश्यक पूर्वाधारको अभावमा ओझेलमा पर्दै आएको थियो । यस क्षेत्रलाई नमूना पर्यटकीय क्षेत्रको रुपमा विकास गर्न संस्कृति,पर्यटन तथा नागरिक उड्यन मन्त्रालयको साझेदारीमा अब काम अगाडि बढ्ने नगर प्रमुख पुनले बताउनुभयो ।
नगरपालिकाको हरेक क्षेत्रको विकासमा आफूहरुले नगर स्तरबाट लागेको बताउदै प्रदेश र संघसँग समेत साझेदारीमा यहाँको विकासकालागि काम अगाडि बढाइरहेको उहाँले बताउनुभयो । ‘हामी नगरको हरेक क्षेत्र समेटर विकासका कामलाई अगाडि बढाइरहेका छौं, पर्यटकीय क्षेत्रको विकासमा मन्त्रलायसँग समेत साझेदारीमा काम गर्न लागेका छौं’ नगर प्रमुख पुनले भन्नुभयो–आवश्यकता अनुसार प्रदेश र संघसग समन्वय गर्दै अघि बढनेछौं ।
पर्यटकीय क्षेत्रको विकासकालागि मन्त्रलायसंगको साझेदारीमा काम अघि बढन् लाग्नु खुसीको कुरा भएको नगर प्रमुख बताउनुभयो ।
टरुवा ताल सहितको क्षेत्रको पर्यटकीय पूर्वाधार विकासकालागि यती धेरै बजेट विनियोजन भएको हो । पहिलो पटक संस्कृति,पर्यटन तथा नागरिक उड्यन मन्त्रालय बीच यती धेरै बजेट साझेदारीमा कार्यक्रम गर्न लागिएको कावासोती नगरपालिका प्रमुख प्रशासकीय अधिकृत यज्ञ पुरीले बताउनुभयो । कावासोती नगरपालिका पर्यटकीय गन्तव्यको प्रवल सम्भावना भएको क्षेत्र भएकाले यसको थप विकासकालागि साझेदारीमा टरुवा क्षेत्रमा काम गर्न लागिएको प्रमुख प्रशासकीय अधिकृत पुरीले बताउनुभयो ।
टरुवा ताल क्षेत्रलाई पर्यटकीय रुपमा विकास गर्ने नगरको पहिल्लैकै योजना रहेको र सोही अनुसार गुरुयोजना समेत तयार गरी सकिएकाले अब ठेक्का प्रकृया मार्फत तत्काल काम अगाडि बढाइने कावासोती नगरपालिकाका आर्किटेक इञ्जिनिएर पवन रुपाखेतीले बताउनुभयो । उहाँले पर्यटन पूर्वाधार विकाशका काम सम्पन्न गरेसँगै टरुवा ताल नगरकै गहनाको रुपमा विकास हुने बताउनुभयो ।
मन्त्रालय र नगरपालिका बीच साझेदारीमा पर्यटन पूर्वाधार विकासमा क्रमागत योजनाको रुपमा कार्यक्रम अगाडि बढ्ने संस्कृति,पर्यटन तथा नागरिक उड्यन मन्त्रालयका शाखा अधिकृत होमनाथ काफ्लेले बताउनुभयो । उहाँका अनुसार तीन वर्ष सम्ममा साझेदारीमा काम सक्ने गरी कार्यक्रम अगाडि बढ्नेछ । मन्त्रालयको रु. चार करोड ५५ लाख र कावासोती नगरपालिकाको रु. २ करोड ४५ लाख लागत साझेदारीमा काम अगाडि बढ्ने शाखा अधिकृत काफ्लेले बताउनुभयो ।
कावासोती नगरपालिकामा रहेको टरुवा ताल यहाँको महत्वपूर्ण क्षेत्र हो । बजार क्षेत्रबाट नजिकै रहेकाले समेत भोलिका दिनमा महत्वपूर्ण गन्तव्यका रुपमा विकास हुने आशा गरिएको छ ।
नमुना पोष्टप्रकाशित मिति: २०७७ माघ २९, बिहिबार (४ साल अघि)
