ड्राइभर्सन सञ्चालनमा आएको ३६ घण्टामा पनि नियमित सवारी सञ्चालन भएन

सवारी अवरोध कम गर्न बजार क्षेत्रमा सवारी होल्ड

चोरमारा । पूर्वपश्चिम राजमार्ग विस्तारको क्रममा गैंडाकोटमा निर्माण गरिएको ड्राइभर्सन बगाएपछि अवरुद्ध बनेको राजमार्ग शुक्रबार बिहान देखि सञ्चालनमा आएपनि नियमित हुन सकेको छैन् ।
बिहिबार बिहान गैंडाकोटको थुम्सी जंगलमा रहेको ड्राइभर्सन बगाएको थियो । अथक प्रयास पछि २४ घण्टा पछि सडक सुचारु भएपनि ड्राइभर्सनमा एक तर्फि मात्रै सवारी सञ्चालन भइरहेको छ । पूर्व र पश्चिम तर्फबाट आउने सवारीलाई एकतर्फी रुपमा पास गराउने व्यवस्था मिलाएको जिल्ला प्रहरी कार्यालय नवलपरासी पूर्वका डिएसपी दिलिप गिरीले बताउनुभयो ।

गैंडाकोट नगरपालिकाको थुम्सी, भेडाबारी, भैंसाखोरी लगायतको स्थानमा निर्माण गरिएको ड्राइभर्सनको कारण राजमार्ग क्षेत्र कुन समयमा पुनः अवरुद्ध हुने हो भन्ने चिन्ता यात्रु तथा सवारी चालकलाई छ ।
माल बहाक सवारीहरुको कारण डाइभर्सन दब्दै जादा त्यसको नियमित मर्मत समेत भइरहेको छ । हलुका सवारीलाई पनि समस्या भइरहेको सवारी चालकहरु बताउछन् ।
शनिबार दिउँसो कावासोती देखि गैंडाकोट क्षेत्रको स्थलगत अनुगमन गर्नु भएका डिएसपी गिरीले सवारी पास भइरहदा हुन सक्ने अवरोध कम गर्न प्रहरी सजक रहेको बताउनुभयो ।

पश्चिम तर्फबाट जाने सवारीहरु दुम्कीबास, अरुणखोला, चोरमरा, डण्डा, रजहर, अमारापुरी लगायतको स्थान र पूर्व बाट आउने सवारी, गैंडाकोट क्षेत्रमा होल्ड गर्दै क्रमश पठाउने काम भइरहेको बताउनुभयो । एकैपटक सवारीको चाप पर्दा राजमार्गमा पुनः जाम हुने र नियमित सवारी सञ्चालनमा थप समस्या हुने भएकाले सो कार्य गरिएको उहाँले बताउनुभयो । सवारी जंगल क्षेत्रमा जाम पर्दा हुने समस्यालाई ध्यानमा राखेर बजार क्षेत्रमा नै होल्ड गरिएको उहाँले बताउनुभयो ।
बुटवल नारायणगढ सडक खण्ड बिस्तारको काम अहिले भइरहेको छ । सो क्रममा विभिन्न स्थानमा पुल निर्माणको क्रममा तयार गरिएको ड्राइभर्सनको कारण समस्या सृजना भइरहेको छ ।
अहिले यो सडक खण्ड भएर यात्रा गर्ने यात्रुले ड्राइभर्सन र जीर्ण सडकको कारण सास्ती खेप्न बाध्य छन् ।
नवलपुरको विभिन्न स्थानमा राजमार्ग जीर्ण भएपनि ठेक्केदार कम्पनीले मर्मतमा चासो नदिदा दुर्घटनाको समेत जोखिम बढ्दै गएको छ ।