बुलिङटारमा इलाका प्रशासन कार्यालय स्थापनाको लागि सिफारिस

कावासोती । नवलपुरको बुलिङटारमा इलाका प्रशासन कार्यालय स्थापना गर्न जिल्लाका राजनैतिकदलहरुले सरकारलाई सिफारिस गरेका छन् ।
आज कावासोतीमा प्रमुख जिल्ला अधिकारी सुमन घिमिरेको अध्यक्षतामा बसेको बैठकले नवलपुर पहाडका बुलिङटार र बौदीकाली गाउँपालिकाका बासिन्दालाई नागरिकता, पासपोष्र्ट लगाएत प्रशासनिक कामलाई सुगमता पुग्ने भएकाले बुलिङटार— ६ अत्रौलीमा ईलाका प्रशासन कार्यालय स्थापना गर्ने निर्णय गरेको बैठकमा सहभागी एमालेका जिल्ला सदस्य एवम् युवा नेता विद्रोही गिरीले जानकारी दिए ।

कालीगण्डकी किनारका बासिन्दाले छिट्टो भन्दा छिट्टो इलाका प्रशासन कार्यालय स्थापना गरिनुपर्ने र प्रहरी निरिक्षकको दरवन्दी सहितको प्रहरी कार्याालय स्थापना पनि जोड दिएका छन् । बुलिङटारको ढाँडबेसी देखी बौदीकालीको रकुवा सम्मको भागका बासिन्दालाई शान्ति सुरक्षा, प्राकृतिक स्रोतको संरक्षणमा प्रशासनले ध्यानदिनुपर्ने बैठकमा सहभागी दलहरुका प्रतिनिधिले जोड दिएका थिए ।

बैठकमा स्थानीय तहको निर्वाचनमा शान्ति सुरक्षाको अबस्था, विपद्को सामना गर्ने बारे समेत छलफल भएको थियो । जिल्ला समन्वय समितिका प्रमुख चेसराम आले, नेकपा ( एमाले) का विद्रोही गिरी, नेपाली काँग्रेसका गोपाल बस्ताकोटी, नेकपा ( माओवादी केन्द्र) का लोकप्रसाद भुर्तेल, राप्रपाका बिष्णु अधिकारी, नेकपा ( एस) का सालिकराम भट्टराई लगाएतका दलका प्रतिनिधिहरुको बैठकमा सहभागीता रहेको थियो। ।