भोलीबाट कावासोतीमा नेपाल आदिवासी जनजाति महासंघको १० औं महाधिवेशन

गंगा बिश्वकर्मा
कावासोती । नेपाल आदिवासी जनजाति महासंघको १० औं महाधिवेशन भोली बुधबारबाट कावासोतीमा सुरु हुने भएको छ । दुई दिन सम्म चल्ने महाधिवेशन कावासोती–२ मा रहेको पानस बैंक्वेटमा हुने आयोजकले जनाएको छ ।“पहिचान सहितको संघियता र स्वायत्तताका लागि संविधान संशोधन हाम्रो आन्दोलन, आदिवासी अधिकारका लागि नवीन समाजिक सहमतिको पक्षमा १० औं महाधिवेशन” भन्ने नारा सहित भोली बुधबारबाट महाधिवेशन सुरु हुने मंगलबार कावासोतीमा पत्रकार सम्मेलन गरि आयोजकले जानकारी दिएको छ । महाधिवेशनको उद्घाटनको लागि प्रधानमन्त्रि शेरवाहादुर देउवालाई ल्याउने प्रयास गरिरहेको र उहाँ नआए गृहमन्त्रि बालकृष्ण खाणलाई उद्घाटनको लागी ल्याउने नेपाल आदिवासी जनजाति महासंघका अध्यक्ष जगत बरामले जानकारी दिनुभयो ।
महासंघका अध्यक्ष बरामले अहिलेको संघियता संरचनाले सबैलाई समेट्न नसकेको भन्दै आफुहरुको त्यसमा बिमती रहेको बताउनुभयो । उहाँले संघियतामा पछाडी परेका आदिवासी जनजातीहरुको हित भन्दा बाहिर रहेको भन्दै त्यसलाई आफ्नो संघसंगठनको माग बमोजिम संशोधन भए मात्र सहमति गरेर अगाडी बढ्ने बताउनुभयो ।

वर्तमान संघिय संरचना अन्र्तगत प्रदेश ७ वटा मात्र रहेकोमा त्यसलाई फराकिलो बनाउदै ११ वटा बनाउनुपर्ने माग रहेको समेत उहाँले बताउनुभयो । अहिलेको संविधान अपुरो र अधुरो रहेको भन्दै यसलाई संशोधन गरीनुपर्ने र आदिवासी जनजातिका पहिचान र अधिकार सहितको मुद्धालाई सम्बोधन गरिनु पर्ने माग समेत उहाँले राख्नुभयो ।
महाधिवेशनमा सहभागी हुन ७७ जिल्ला र बिदेशबाट समेत प्रतिनिधि र पर्यपक्षेकहरु आउने महासंघका अध्यक्ष बरामले बताउनुभयो । महाधिवेशनले १ सय १२ जनाको कार्यसमिति चयन गर्नेछ । जसमा समान सहभागिता महिला ५६ जना र पुरुष ५६ जना चयन गरिने छ ।
महाधिवेनमा देश तथा वाहिरबाट गरी जम्मा ४२० जना प्रतिनिधीको सहभागिता रहने पत्रकार सम्मेलन मार्फत जानकारी दिएको हो ।