मध्यविन्दुले घरमै पुगेर जेष्ठ नागरिकको स्वास्थ्य परिक्षण गर्ने

चोरमारा । नवलपरासी पूर्वको मध्यविन्दु नगरपालिकामा भोलि बुधबार देखि जेष्ठ नागरिकको नियमित स्वास्थ्य परिक्षण हुने भएको छ । नगरपालिकाको आर्थिक वर्ष २०७९/०८० को नीति तथा कार्यक्रममा जेष्ठ नागरिकलाई घरमा नै पुगेर नियमित स्वास्थ्य परिक्षण सेवा सञ्चालन गर्ने उल्लेख गरेको नगरपालिकाले बुधबार देखि कार्यक्रम शुरुवात गर्न लागेको हो । भोलि देखि नगरपालिकाको सबै वडामा रहेका स्वास्थ्यकर्मीले वडा भित्रका ७० वर्ष माथिका जेष्ठ नागरिकको घरमा नै पुगेर महिनाको कम्तीमा एक पटक स्वास्थ्य परिक्षण गर्ने नगर प्रमुख भिमलाल अधिकारीले बताए । उनका अनुसार अब प्रत्येक महिनामा कम्तीमा एक– एक पटक स्वास्थ्यकर्मी जेष्ठ नागरिकको घरमा पुगेर स्वास्थ्य परिक्षण गर्नेछन् । यस्तै नियमित रुपमा बिशेषज्ञ चिकित्स मार्फत जेष्ठ नागरिकहरुको लागि स्वास्थ्य शिविर समेत सञ्चालन गरिने छ ।

पहिलो चरणमा घरघरमा स्वास्थ्यकर्मी परिचालन गरेर स्वास्थ्य परिक्षण र त्यसपस्चात आवश्यकता अनुसार बिशेषज्ञ चिकित्सक मार्फत सेवा प्रवाह गर्ने नगरपालिकाको प्रमुख प्रशासकीय अधिकृत बासुदेव खनालले बताए । उनका अनुसार मध्यविन्दु–७ र ८ मा नगर प्रमुख भिमलाल अधिकारीको प्रमुख आतिथ्यतामा कार्यक्रमको शुभारम्भ गर्ने योजना बनाइएको छ भने अन्य वडाहरुमा सम्बन्धित वडाका जनप्रतिनिधि र चिकित्सहरुको सहभागीतामा कार्यक्रम शुरुवात हुनेछ ।