बढ्यो रेमिट्यान्स, साउन-भदौमा २ खर्ब ६३ अर्ब भित्रियो

काठमाडौँ । चालु आर्थिक वर्षको पहिलो दुई महिना (साउन–भदौ) मा २ खर्ब ६३ अर्ब रुपैयाँ रेमिट्यान्स भित्रिएको छ। नेपाल राष्ट्र बैंकले मंगलवार सार्वजनिक गरेको विवरण अनुसार साउनमा १ खर्ब ३६ अर्ब र भदौमा १ खर्ब २७ अर्ब रुपैयाँको रेमिट्यान्स भित्रिएको हो। राष्ट्र बैंकका अनुसार भदौसम्मको रेमिट्यान्स आप्रवाह अघिल्लो आवको यसै महिनाको तुलनामा १८.७ प्रतिशतले बढी हो।

अमेरिकी डलरमा रेमिट्यान्स १ अर्ब ९६ करोड आएको छ। अघिल्लो वर्षको यसै महिनामा डलरमा रेमिट्यान्स १ अर्ब ७३ करोड थियो। यस वर्ष वैदेशिक रोजगारीमा जानेको संख्यामा समेत वृद्धि भएको छ। समीक्षा अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत-नयाँ) लिने नेपालीको संख्या ७६ हजार ४८५ र पुनः श्रम स्वीकृति लिनेको संख्या ४० हजार ५८३ रहेको छ।