केन्द्रको निर्देशन विपरीत मध्यविन्दु नगरपालिकाद्वारा शैक्षिक गतिविधि सञ्चालन, स्थानीय तहबीच निर्णय असंगति बढ्दै

नवलपुर । संघ सरकारले तोकेको समयतालिकाविपरीत स्थानीय तहहरूले धमाधम विद्यार्थी भर्ना तथा पठनपाठन सञ्चालन गर्न थालेका छन्। यसै क्रममा नवलपुरको मध्यविन्दु नगरपालिकाले पनि केन्द्र सरकारको निर्णयसँग पूर्ण रूपमा नमिल्ने गरी शैक्षिक कार्यक्रम अघि बढाएको देखिएको छ।
मध्यविन्दु नगरपालिकाले जारी गरेको पत्र अनुसार, सार्वजनिक बिदा र कक्षा १२ को बोर्ड परीक्षाका कारण शैक्षिक सत्र २०८३ को नियमित पठनपाठन प्रभावित हुने देखिएपछि वैकल्पिक व्यवस्था अपनाइएको उल्लेख गरिएको छ। नगरपालिकाले विद्यालयहरूलाई दिउँसो ४ बजेसम्म समेत शैक्षिक गतिविधि सञ्चालन गरी तोकिएको “क्रेडिट आवर” पूरा गर्न निर्देशन दिएको छ।

पत्रमा भनिएको छ कि वार्षिक शैक्षिक योजना निर्माणमा समस्या देखिएकाले विद्यालयहरूले अतिरिक्त समय प्रयोग गरेर पाठ्यक्रम पूरा गर्नुपर्ने अवस्था आएको हो। यसका लागि सार्वजनिक बिदाको समयसमेत उपयोग गर्दै शिक्षण सिकाइ क्रियाकलाप सञ्चालन गर्न आग्रह गरिएको छ।
यसअघि केन्द्र सरकारले वैशाख १५ गतेदेखि विद्यार्थी भर्ना र २१ गतेदेखि नियमित पठनपाठन सञ्चालन गर्ने निर्णय गरेको थियो। तर मध्यविन्दु नगरपालिका लगायतका विभिन्न स्थानीय तहहरूले आफ्नै शैक्षिक क्यालेन्डर अनुसार कार्यक्रम अघि बढाइरहेका छन्।

यसले देशभर शिक्षा व्यवस्थापनमा एकरूपता अभाव देखिएको छ। संविधानले स्थानीय तहलाई आधारभूत तथा माध्यमिक तहको शिक्षा व्यवस्थापनको अधिकार दिएको भए पनि संघीय सरकारको निर्देशनसँग बाझिने गरी निर्णय आउँदा अभिभावक, शिक्षक र विद्यार्थी अन्योलमा पर्ने अवस्था सिर्जना भएको छ।
शिक्षा क्षेत्रका सरोकारवालाहरूले संघ, प्रदेश र स्थानीय तहबीच समन्वय अभावका कारण यस्तो समस्या दोहोरिएको बताएका छन्। उनीहरूले एकीकृत नीति र स्पष्ट निर्देशन आवश्यक रहेको बताएका छन्।