जेनजी आन्दोलनमा फरार अभियुक्तद्वारा देवचुलीमा हत्या र लुटपाट, काठमाडौंबाट पक्राउ

कावासोती । जेनजी आन्दोलनका क्रममा कास्की कारागारबाट फरार भएका एक अभियुक्तले नवलपरासी (बर्दघाट सुस्ता पूर्व) को देवचुलीमा वृद्ध दम्पतीमाथि आक्रमण गरी हत्या तथा लुटपाट गरेको घटना सार्वजनिक भएको छ। उक्त घटनामा संलग्न अभियुक्तलाई प्रहरीले काठमाडौंबाट पक्राउ गरेको छ।

देवचुली नगरपालिका–१६ टाँगीकोट टोलमा २०८२ चैत २३ गते बिहान सुतिरहेको अवस्थामा ७५ वर्षीय जिउनराम थनेत र उनकी श्रीमती ७१ वर्षीया गुलबसनिया थनेतमाथि टाउकोमा प्रहार गरी सुनका गरगहना लुटपाट गरिएको थियो। गम्भीर घाइते जिउनरामको उपचारका क्रममा मृत्यु भएको थियो भने गुलबसनियाको चितवनमा उपचार भइरहेको प्रहरीले जनाएको छ।

घटनामा संलग्न ३१ वर्षीय संजय विकलाई काठमाडौं महानगरपालिका–४ सुकेधाराबाट पक्राउ गरिएको प्रहरीले जनाएको छ। उनको साथबाट नगद ३ लाख ७५ हजार रुपैयाँ, ३ थान मोबाइल सेट तथा एनटीसी र एनसेलका ४/४ थान सिमकार्ड बरामद गरिएको जिल्ला प्रहरी कार्यालय नवलपरासी पूर्वको सुचना अधिकारी अनिल पण्डितले जानकारी दिए । प्रहरीका अनुसार विक यसअघि २०८० मंसिर ५ गते कास्कीमा महिलाको हत्या तथा लुटपाट घटनामा संलग्न रही कारागारमा रहेका थिए। २०८२ भदौ २४ गते जेनजी आन्दोलनका क्रममा कास्की कारागारबाट फरार भएका उनी पुनः गम्भीर अपराधमा संलग्न भएको खुलेको हो।

अभियुक्तविरुद्ध कर्तव्य ज्यानसम्बन्धी कसूरमा नवलपुर जिल्ला अदालतबाट ७ दिनको म्याद थप गरी थप अनुसन्धान भइरहेको प्रहरीले जनाएको छ।