नारायणगढ-मुग्लिन सडकखण्डमा फेरी पहिरो खस्यो, सडक दुईतर्फी अबरुद्ध

चितवन । नारायणगढ–मुग्लिन सडकखण्ड गयराती पहिरो खसेको छ । भरतपुर महानगरपालिका २९ स्थित केराबारीमा (मौरी खोला पुल नजिकै) पहिरो खस्दा सडक अबरुद्ध भएको हो । केराबारीमा बर्षातका कारण लेदोसहितको पहिरो खसेको जिल्ला प्रहरी कार्यालय चितवनले जानकारी दिएको छ ।

राती २ बजे खसेको पहिरो डिभिजन सडक कार्यालय भरतपुरसंग समन्वय गरेर पन्छाउने काम भइरहेको जिल्ला प्रहरी कार्यालय चितवनका प्रवक्ता नरहरी अधिकारीले जानकारी दिनुभयो । एक साताको अवधिमा सो क्षेत्रमा पटकपटक पहिरो खसेर सडक अवरुद्ध भएको छ । बर्खाको समयमा सकेसम्म नारायणगढ– मुग्लिन सडकखण्डमा यात्रा नगर्न प्रहरीले सबैमा अनुरोध गरेको छ ।