एमाले नवलपुरले उम्मेदवार सिफारिसका लागि बैठक डाक्यो

कावासोती । नेकपा (एमाले ) नवलपुरले मंसिर ४ गते हुने प्रतिनिधि सभा र प्रदेश सभाको निर्वाचनका लागि उम्मेदवार सिफारिस गर्न क्षेत्रिय कमिटिहरुको बैठक बोलाएको छ । आइतवार भदौं १९ गते २ वटा प्रतिनिधि सभा र ४ वटा प्रदेश सभाका लागि उम्मेदवार चयनका बैठक डाकेको एमालेका युवा नेता एवम् प्रदेश सभा क्षेत्रिय समन्वय कमिटिका सचिव विद्रोही गिरीले जानकारी दिनुभयो ।

भदौ १९ मा उम्मेदवार सिफारिका लागि मनोनयन गर्न प्रतिनिधि सभा क्षेत्र नंंं १ र सो अन्तरगतको प्रदेश सभा क र ख को दलदलेमा र क्षेत्र नं. २ र सो अन्तरगतको क र ख को डण्डामा बैठक बस्ने र उक्त सिफारिस २० गते हुने जिल्ला कमिटिको बैठकमा पेश हुनेछ । शुक्रवार कावासोतीमा जिल्लाका पदाधिकारी, क्षेत्रिय समन्वय कमिटिका पदाधिकारी, जिल्लाबाट प्रतिनधित्व गर्ने प्रदेश कमिटिका सदस्यहरु, केन्द्रीय सल्लाहकार कमिटिका सदस्यहरु, केन्द्रीय सदस्यहरुको सहभागीतामा भएको बैठकले उक्त निर्णय गरेको सचिव गिरीले बताउनुभयो ।

उम्मेदवार सिफारिस मनोनयनका लागि प्रतिनिधि सभाका लागि रु १० हजार, प्रदेश सभाका लागि रु ५ हजार र समानुपातिकका लागि रु ३ हजार दस्तुत तोकिएको कार्यालय सचिव भीमलाल कण्डेलले जानकारी दिनुभयो । पार्टी सदस्यता भएको तर नविकरण नभएकाहरुले भने मनोनयन दर्ता गर्न नपाउने कण्डेलले बताउनुभयो ।

बैठक जिल्ला अध्यक्ष मुक्तिराम पाण्डेको अध्यक्षता र सचिव भीमलाल अधिकारीको सञ्चालनमा भएको थियो भने केन्द्रीय सदस्यत्रय तिलक महत, रविन्द्र अधिकारी, कृष्ण पौडेलको उपस्थिति रहेको थियो ।