अरुणखोलाको रंगशाला निर्माणमा बजेट अभाव

मीनाक्षी कंडेल ,  कावासोती ।  पूर्वी नवलपरासीको मध्यविन्दु १० मा निर्माणधीन रंगशाला बजेट अभावले सम्पन्न हुन सकेको छैन् । पूर्व पश्चिम राजमार्गको मध्यभागमा अवस्थित सहिद रमा स्मृति रंगशाला २०६३ सालमा निर्माण गरिएता पनि आवश्यक बजेट अभावका कारण सम्पन्न हुन नसकेको हो । हालसम्म उक्त रंगशालामा मध्यविन्दु नगरपालिका, एन्फा, अरुणखोला सामुदायिक वन, साविक नयाँ बेलाहनी गाविस, साविक जिल्ला विकास समिति नवलपरासी, राष्ट्रिय खेलकुद परिषद, गण्डकी प्रदेश सरकार, संघ सरकारको यूवा तथा खेलकुद मन्त्रालय र मध्यविन्दु नगरपालिकाका आर्थिक सहयोगमा उक्त रंगशालाको वाउण्डरीवाल, प्याराफिट, चेन्जिङ रुम, गेट, अफिस रुम लगायतका संरचना निमार्ण भएको सहिद रमा स्मृति रंगशालाको अध्यक्ष मेघराज पाण्डेले जानकारी दिए ।

गत आर्थिक वर्ष २०७९/८० मा मात्रै खेलकुद मन्त्रालयबाट रु ३५ लाख रुपैया, राष्ट्रिय खेलकुद परिषदबाट २० लाख रुपैया र मध्यविन्दु नगरपालिकाबाट १५ लाख रुपैया विनियोजित रकमबाट रंगशालामा प्याराफिटको जग, पिल्लर निर्माण तथा पश्चिम भागमा प्याराफिट निर्माणको काम सम्पन्न भएको मध्यविन्दु नगरपालिका खेलकुद विकास समितिका सदस्य सचिव हिमाल सिंह ठकुरीले जानकारी दिए । अध्यक्ष पाण्डेको अनुसार हाल सम्म रंगशालामा २ करोड रुपैया बराबरको लगानीमा हालको संरचना निर्माण भएको हो । मध्यविन्दु खेलकुद विकास समितिको अध्यक्ष समेत रहेका मेघराज पाण्डेले रंगशाला सँगै रहेको निर्माणधीन कर्भडहलको निर्माणको कार्य भने ८० प्रतिशत सकिएको जानकारी दिए । पाण्डेले रंगशाला पूर्णरुपमा निर्माण पूरा गर्न अझै अनुमानित १० करोड रुपैया आवश्यक रहेको बताएका छन् ।

खेलाडी तथा दर्शकहरुका लागि रंगशाला परिसरमा रनिङ ट्रयाकिङ, प्याराफिट, प्याराफिट ट्रस, शौचालय, खानेपानी ट्रेनिङ सेन्टर भवन लगायतका आवश्यक संरचना बन्न बाँकी रहेको अध्यक्ष पाण्डेले बताए । एक स्थानीय तह एक खेलमैदान अवधारण अनुरुप निर्माण गरिएको उक्त रंगशाला परिसरमा रहेको कभर्डहलमा ब्याटमिन्टन, भलिबल खेल सञ्चालन हुदै आएको छ ।
निर्माणधीन रंगशाला निर्माण पस्चात फुटवल, किक्रेट, ऐल्थेटिक्सका बिभिन्न खेलहरु खेलाउन सकिने पाण्डेले बताएका छन् ।
उनले रंगशाला पूर्णरुपमा निमार्ण सम्पन्न गर्न स्थानीय, प्रदेश र संघ सरकारले विशेष बजेट दिनुपर्ने बताएका छन् ।