स्ववियुको माग पुरा गर्न मध्यविन्दु क्याम्पस प्रशासन सहमत

नवलपुर । दश प्रतिशत छात्रवृत्तीको माग गर्दै आन्दोलनरत विद्यार्थीको मागमा अन्ततः मध्यविन्दु बहुमुखी क्याम्पस प्रशासन सहमत भएको छ । बिहिबार अबेर राती स्ववियु सभापति केशव भुसाल र क्याम्पस प्रमुख गणेशमान गिरीले सहमति पत्रमा हस्ताक्षर गरेका हुन् ।
विद्यार्थी संख्याको आधारमा १० प्रतिशत विद्यार्थीले छात्रवृत्ती प्राप्त गर्नुपर्ने माग गर्दै विगत केही दिन देखि स्वतन्त्र विद्यार्थी युनियन मध्यविन्दु बहुमुखी क्याम्पस आन्दोलित बनेको थियो । शुरुवातमा विद्यार्थीको माग प्रति अनुदार देखिएको क्याम्पस प्रशासनले अन्ततः हाल प्रदान गर्दै आएको तिन प्रतिशत छात्रवृत्तीलाई बढाएर १० प्रतिशत बनाउन तयार भएको हो ।
स्ववियु पदाधिकारी र क्याम्पस प्रशासनबीच क्याम्पस सञ्चालन नियमावलीमा रहेको तिन प्रतिशत छात्रवृत्तीलाई १० प्रतिशत कायम गरी तत्काल कार्यान्वयन गर्ने सहमती भएको स्ववियु सभापति केशव भुसालले जानकारी दिए । ‘विद्यार्थीका अधिकारको पक्षमा हामीले उठाएको आन्दोलनले सार्थकता प्राप्त गरेको छ । अब यसलाई तत्काल कार्यान्वयन गर्न तर्फ हाम्रो दवाव हुनेछ । ’ भुसालले भने – ‘आन्दोलनमा प्रत्यक्ष वा अप्रत्यक्ष रुपमा जोडिनु भएका सबै विद्यार्थीहरु बधाईका हकदार हुनुहुन्छ ।’
स्ववियुले छात्रवृत्ती कार्यान्वयनको लागि दवाव स्वरुप विद्यार्थीको हस्ताक्षर संकलन, सिठ्ठी जुलुस, पर्चा वितरण लगायतको कार्यक्रम गरेको थियो ।
मध्यविन्दु बहुमुखी क्याम्पसमा हाल अनेरास्ववियुले स्ववियुको नेतृत्व गरेको छ । मध्यविन्दु बहुमुखी क्याम्पसबाट शुरुवात भएको यो अभियानलाई क्रमशः जिल्लाका सबै क्याम्पसहरुमा अनिवार्य गर्ने तर्फ छलफलहरु शुरु भएको अनेरास्ववियु मध्यविन्दु क्याम्पस कमिटी अध्यक्ष समेत रहकी स्ववियु कोषाध्यक्ष मनिषा पौडेलले बताईन ।