नवलपुरको यातायात कार्यालयमा अब टोकन सिस्टम

नवलपुर । नवलपरासी (बर्दघाट सुस्ता पूर्व)को यातायात व्यवस्था कार्यालयले सेवा प्रवाह गर्न टोकन प्रणाली लागु गर्ने भएको छ । गण्डकी प्रदेशका भौतिक पूर्वाधार विकास तथा यातायात व्यवस्था मन्त्री प्रकाशबहादुर केसीले बुधबार निर्देशन दिएपछि कार्यालयले सेवा सुधारको योजना बनाएको हो । यातायात मन्त्री केसी बुधबार यातायात व्यवस्था कार्यालयको निरीक्षणमा आउनुभएको थियो । यहाँ सेवाग्राहीले हरेक कामलाई लाइन बस्नुपर्ने झन्झट भएको गुनासो गरे । त्यसपछि उहाँले कार्यालयका निमित्त प्रमुख सुरेश जैसवाललाई दुई दिन तयारी गरेर टोकन प्रणालीको सुरुवात गर्न निर्देशन दिनुभयो । निमित्त प्रमुख जैसवालले आवश्यक तयारी गरेर निर्देशनअनुसार काम गर्ने बताउनुभयो ।

मन्त्री केसीले यातायात कार्यालयका सेवा प्रवाहको अवस्था, कार्यालयको समस्याको विषयमा कार्यालयका कर्मचारीसँग जानकारी लिनुभएको थियो । निमित्त प्रमुख जैसवालले लाइसेन्ससम्बन्धी सम्पूर्ण सिस्टम यातायात व्यवस्था विभागमा रहेको र गल्ती सच्याउने अधिकार पनि नभएको गुनासो गर्नुभयो । ‘कहिलेकाहीँ केही विवरण बिग्रियो भने सच्याउन पर्छ । तर हामीले विवरण अपडेट गरेपछि हाम्रो हातमा केही हुँदैन । त्यो सच्याउने अधिकार पनि हामीलाई छैन’ उहाँले भन्नुभयो । कहिलेकाहीँ विभागको सिस्टम नचल्दा सेवाग्राहीले गुनासो पोख्ने र चाप बढ्ने गरेको निमित्त प्रमुख जैसवालले बताउनुभयो ।

उहाँले लिखित र ट्रायल परीक्षा सकिएको एक हप्ताभित्र नतिजा सार्वजनिक गरिँदै आएको जानकारी गराउनुभयो । निमित्त प्रमुख जैसवालले गत आर्थिक वर्षमा रु. ३३ करोड र चालु आर्थिक वर्षको चार महिनामा कार्यालयले रु. ८ करोड पचास लाख राजस्व सङ्कलन गरेको जानकारी दिनुभयो ।
कार्यालयको अवस्था जानकारी लिएपछि मन्त्री केसीले सर्भरको समस्या देशव्यापी भएको तर विभागीय मन्त्रीको हैसियतले यातायात व्यवस्था विभागको ध्यानाकर्षण गराउने बताउनुभयो ।

लाइसेन्समा दायाँबायाँ सुन्न नपरोस्
कार्यालयको ब्रिफिङपछि मन्त्री केसीले आफ्ना कुरा राख्न थाल्नुभयो । लाइसेन्सको विषय निस्किएपछि उहाँले नवलपुरको यातायात कार्यालयको बारेमा आफूले सकारात्मक कुरा नसुनेको भन्दै सचेत गराउनुभयो । ‘लाइसेन्सको बारेमा मैले कार्यालयको बारेमा राम्रो सुनेको छैन । दायाँबायाँ गरेको अब सुन्न नपरोस्’ मन्त्री केसीले चेतावनी दिँदै भन्नुभयो ‘भोलि प्रमाणसहित फेला प¥यो भने बहानाबाजी चल्दैन । अख्तियारले समात्यो भने तपाईंहरु लाई पनि नराम्रो हुन्छ । मन्त्रालय र प्रदेश सरकारलाई पनि नराम्रो हुन्छ ।’ जवाफमा कार्यालयका कर्मचारीले बाहिर भनिएजस्तो अनियमित काम नहुने गरेको बताए ।
लाइसेन्स र ट्रायलमा गडबडी नगर्न, सेवाग्राहीलाई दुःख नदिन र सेवा लिँदा सहज वातावरण बनाउन, आफूले मन्त्री भएपछि हेल्प डेस्क राख्ने भनेर गरेको पहिलो निर्णयलाई निरन्तरता दिन मन्त्री केसीले कर्मचारीलाई निर्देशन दिनुभयो ।
भौतिक मन्त्री केसीले बुधबार नै पूर्वाधार विकास कार्यालय नवलपरासी (बर्दघाट सुस्ता पूर्व)को पनि निरीक्षण गर्नुयभो । त्यहाँ मन्त्री केसीलाई कार्यालय प्रमुख कृष्ण आचार्यसँग चालु आर्थिक वर्षको योजना कार्यान्वयनको अवस्थाबारे जानकारी गराए । उहाँले चालु आर्थिक वर्षका योजनामध्ये १०३ वटा योजना कार्यान्वयनको अवस्थामा रहेको बताउनुभयो ।
मन्त्री केसीले चालु आर्थिक वर्षको ठेक्का लगाउन बाँकी योजनाको काम पनि मंसिरभित्रै सक्न निर्देशन दिनुभयो । निरीक्षणमा मन्त्री केसीसँगै मन्त्रालयका सचिव कमलकुमार अधिकारी, मन्त्रालयको योजना अनुगमन मूल्यांकन तथा पूर्वाधार महाशाखा प्रमुख डा. महेन्द्र बानिया पनि सहभागी थिए ।