गण्डकी प्रदेशमा सडक सुरक्षा तथा ट्राफिक सचेतना सप्ताह सुरु

पोखरा ।

‘जिम्मेवार चालक ‘म’, जिम्मेवार यात्री ‘हामी’, सुरक्षित सडक र सवारी, हामी सबैको जिम्मेवारी’ भन्ने मूल नाराका साथ गण्डकी प्रदेशव्यापी सडक सुरक्षा तथा ट्राफिक सचेतना प्रवद्र्धन कार्यक्रमको शुभारम्भ गरिएको छ ।

सवारी दुर्घटना न्यूनीकरण गरी धनजनको क्षति कम गर्ने, विभिन्न सरकारी संयन्त्र तथा सरोकारवाला निकायबीच समन्वय र सहकार्य प्रवद्र्धन गर्ने, यातायात व्यवस्था सम्बन्धी ऐन तथा नियमहरूको प्रभावकारी कार्यान्वयन सुनिश्चित गर्ने, सामुदायिक संघसंस्था, विद्यालय, नागरिक समाज तथा सञ्चार क्षेत्रको सहभागिता अभिवृद्धि गर्ने उद्देश्यले गण्डकी प्रदेश प्रहरीले ट्राफिक सचेतना सप्ताह सुरु गरेको हो ।

गण्डकी प्रदेश सरकारको सहयोग तथा नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय, गगनगौंडा (कास्की) को आयोजनामा विविध कार्यक्रमहरू सञ्चालन गरिने उक्त सप्ताहव्यापी जनचेतनामूलक कार्यक्रमको उद्घाटन गण्डकी प्रदेशका मुख्यमन्त्री सुरेन्द्रराज पाण्डेले पानसमा दीप प्रज्वलन गरी विद्यार्थीहरूलाई हेल्मेट लगाउन सिकाउँदै गरे ।

गण्डकी प्रदेश प्रहरी प्रमुख प्रहरी नायब महानिरीक्षक (डिआइजी) दिनेशकुमार आचार्यको अध्यक्षतामा सम्पन्न कार्यक्रममा पोखरा महानगरपालिकाका मेयर धनराज आचार्य, रुपा गाउँपालिकाका अध्यक्ष नवराज ओझा, माछापुच्छ्रे गाउँपालिकाका अध्यक्ष मिनबहादुर गुरुङ र अन्नपूर्ण गाउँपालिकाका अध्यक्ष विष्णुबहादुर केसी विशेष अतिथिका रूपमा सहभागी थिए ।
उद्घाटनकै अवसरमा प्रदेशका सबै जिल्लामा ट्राफिक सचेतनामूलक प्रभातफेरी गरिएको थियो। ‘तीव्र गति जीवन क्षति’, ‘तपाईं–हाम्रो जिम्मेवारीः सुरक्षित सवारी’ जस्ता नारा लेखिएका प्लेकार्डसहितको प्रभातफेरीमा विद्यार्थी, शिक्षक, सुरक्षाकर्मी, क्लब तथा विभिन्न संघसंस्थाका प्रतिनिधिहरू सहभागी थिए ।

कार्यक्रममा सचेतनामूलक नाटक पनि प्रस्तुत गरियो । सो अवसरमा मुख्यमन्त्री पाण्डेले सडक तथा सवारी दुर्घटना न्यूनीकरणका लागि गण्डकी प्रदेश प्रहरीले सञ्चालन गरेका कार्यक्रमहरूले प्रभावकारी भूमिका खेलेको र थप सफलता प्राप्त गर्न सबैको साथ आवश्यक रहेको बताए ।

कार्यक्रममा गण्डकी प्रदेश सरकारका प्रमुख सचिव शोभाकान्त पौडेल, पोखरा महानगरपालिकाका मेयर धनराज आचार्य, नेपाल यातायात व्यवसायी राष्ट्रिय महासंघ गण्डकी प्रदेशका संयोजक केदार पौडेललगायतले कार्यक्रम सफलताको शुभकामना दिए ।

नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय, गगनगौंडाका प्रमुख प्रहरी उपरीक्षक दानबहादुर थापाले स्वागत मन्तव्य राख्दै विश्वव्यापी, राष्ट्रिय तथा गण्डकी प्रदेशमा देखिएका सडक दुर्घटनाका तथ्यांकहरु प्रस्तुत गरे।
त्यसैगरी, गण्डकी प्रदेश प्रहरी प्रमुख डिआइजी दिनेशकुमार आचार्यले प्रहरी सधैं नागरिकको सुरक्षामा समर्पित रहेको उल्लेख गर्दै सवारी दुर्घटना न्यूनीकरणका लागि सबैले आ–आफ्नो भूमिका निर्वाह गर्नुपर्ने बताए। साथै, उनले सहभागी सबैप्रति आभार प्रकट गरे ।

सप्ताहव्यापी ट्राफिक सचेतना कार्यक्रममा चालकहरूको स्वास्थ्य परीक्षण, सडकमै सवारी प्रयोगकर्तालाई तालिम, ग्रामीण यातायात लक्षित कार्यक्रम, स्टीकर टाँस्ने कार्य, ट्राफिक प्रहरीलाई चस्मा वितरण, सञ्चारकर्मीहरूसँग अन्तरक्रिया तथा समापनमा दीप प्रज्वलन जस्ता गतिविधिहरू समावेश गरिएको जनाइएको छ ।

कार्यक्रम जसरी सञ्चालन गरिए पनि सडक तथा सवारी प्रयोगकर्ताहरू स्वयं सजग नभएसम्म दुर्घटनाबाट जोगिन सकिँदैन भन्ने सन्देश दिँदै आयोजकहरूले सबैलाई सवारी तथा सडक सुरक्षासम्बन्धी नियम पालना गर्न आग्रह गरेका छन् ।