मध्यविन्दु–१४ लाई कृषि र पर्यटन केन्द्र बनाउन योजना अघि बढ्दै : नगरप्रमुख अधिकार 

मध्यविन्दु। मध्यविन्दु नगरपालिका वडा नं. १४ काे समग्र विकासलाई प्राथमिकतामा राख्दै नगरप्रमुख भिमलाल अधिकारीले पहाडी क्षेत्रको समृद्धि कृषि, पूर्वाधार र पर्यटनसँग जोडेर अघि बढाइने बताएका छन्।

साविक राकाचुली र मैनाघाट गाविसका विभिन्न वडाहरू समेटेर बनेको यो वडा भौगोलिक, सांस्कृतिक र सामाजिक दृष्टिले छुट्टै पहिचान बोकेको क्षेत्र हो। सहज सडक सञ्जाल, स्वच्छ खानेपानी, शिक्षा र स्वास्थ्यमा पहुँचका साथै आर्थिक वृद्धिका लागि नगरपालिकाले योजनाबद्ध पहल गरिरहेको नगरप्रमुख अधिकारीले  बताएका छन्।

उनका अनुसार वडा नं. १४ मा कृषकलाई व्यावसायिक बनाउने उद्देश्यले यस आर्थिक वर्षमा २० जना बाख्रापालक कृषकलाई नगरपालिकाले रु. १ लाख नगद र कृषककै श्रम लागतसहित रु. २ लाख बराबरको आधुनिक खोर निर्माण गरिदिएको छ। “उहाँहरूको उत्पादनलाई बजारसम्म सहज रूपमा पुर्‍याउने हाम्रो प्रतिबद्धता छ,” नगरप्रमुख अधिकारीले भने ।

त्यस्तै, छाप्रादी, चनौटे लगायतका स्थानमा १० जना कृषकलाई टनेलमार्फत जैविक खेतीमा प्रोत्साहित गरिंदैछ। एक सयभन्दा बढी कृषकलाई हाते ट्याक्टर, सिँचाइका लागि पाइप, जैविक मल, स्प्रे ट्यांकी, ट्रे लगायतका सामग्री प्रदान गरिएको जनाइएको छ।

“हाम्रो पहाडी क्षेत्र हाम्रो गहना हो। भौतिक विकाससँगै नागरिकको जीवनस्तर सुधार गर्नु हाम्रो लक्ष्य हो,” अधिकारीले भने । योजनाहरूको सफल कार्यान्वयनमा स्थानीयवासीको सक्रियता र सहभागिता आवश्यक रहेको उनले स्पष्ट पारे।

आर्थिक तथा कृषिक गतिविधिसँगै वडामा पर्यटन प्रवर्द्धनको सम्भावना रहेको भन्दै सामुदायिक होमस्टे सञ्चालनका लागि छलफल अगाडि बढाइएको नगरप्रमुख अधिकारीले जनाएका छन्। “यहाँको हावापानी, दृश्यावलोकन र सांस्कृतिक सम्पदाले पर्यटकलाई मोहित पार्न सक्छ,” उनको भनाइ छ।

उनले कृषि व्यवसायीकरण, स्वरोजगारको सृजना र पर्यटन प्रवर्द्धनमार्फत वडालाई आर्थिक समृद्धिको दिशामा लैजाने विश्वास व्यक्त गरेका छन्।