नवलपुर–२ बाट निर्वाचित मनिष खनालको प्रतिबद्धता: “यो मेरो होइन, परिवर्तन चाहने नवलपुरवासीको साझा जीत हो”

नवलपुर । नवलपुर क्षेत्र नम्बर २ बाट प्रतिनिधि सभा सदस्यमा निर्वाचित मनिष खनालले आफ्नो विजयलाई व्यक्तिगत सफलता नभई परिवर्तनको पक्षमा उभिएका सम्पूर्ण नवलपुरवासीको साझा जीत भएको बताएका छन्। सामाजिक सञ्जाल फेसबुकमार्फत उनले मतदाताप्रति आभार व्यक्त गर्दै जनताको विश्वासलाई कर्मबाट प्रमाणित गर्ने प्रतिबद्धता जनाएका हुन्।
खनालले चुनाव देश कठिन समय र राजनीतिक अन्योलताका बीच सम्पन्न भएको उल्लेख गर्दै मतदाताले परिवर्तनको पक्षमा साहसी निर्णय गरेको बताए। उनले यस निर्णयले नेपाली जनताको विवेक, साहस र लोकतन्त्रप्रतिको आस्थालाई पुनः प्रमाणित गरेको बताएका छन्।
उनले “जेन–जी विद्रोह” का शहीदहरू तथा लोकतन्त्र, न्याय र स्वतन्त्रताका लागि जीवन अर्पण गर्ने सम्पूर्ण ज्ञात–अज्ञात शहीदप्रति श्रद्धाञ्जली अर्पण गर्दै घाइतेहरूको त्यागलाई सधैं स्मरण गर्ने उल्लेख गरेका छन्।

खनालले आफूले प्राप्त गरेको ४१ हजार ३४७ मतलाई नयाँ पुस्ताको आवाज, आशाको मत र स्वच्छ तथा उत्तरदायी राजनीति चाहने जनताको स्पष्ट अभिमतको रूपमा व्याख्या गरेका छन्। लामो समयदेखि फैलिएको “राजनीति गर्न पैसा र पहुँच चाहिन्छ” भन्ने भ्रमलाई जनताले तोडेको उनले बताएका छन्। सामान्य परिवारबाट आएको व्यक्तिले पनि निष्ठा, इमानदारीता र जनविश्वासका आधारमा चुनाव जित्न सक्छ भन्ने विश्वास पुनः स्थापित भएको उनले बताएका छन्।

भाद्र २३ मा राज्यको अकर्मण्यताका कारण हत्या गरिएका आफ्ना साथीहरूको स्मरण गर्दै खनालले उनीहरूको सपना र त्यागलाई सम्मान गर्दै न्याय, सुशासन र जनअधिकारको पक्षमा इमानदारीपूर्वक काम गर्ने प्रण गरेका छन्। संसदमा पुग्नु मात्र ठूलो कुरा नभई त्यहाँ पुगेर जनताको आवाज निर्भीक रूपमा उठाउनु र देशका लागि सही नीतिनियम निर्माणमा योगदान दिनु आफ्नो वास्तविक जिम्मेवारी हुने उनको भनाइ छ।
खनालले आफू कुनै एक दलको मात्र प्रतिनिधि नभई नवलपुर क्षेत्र नम्बर २ का सम्पूर्ण जनताको साझा प्रतिनिधि भएको बताएका छन्। आगामी पाँच वर्ष पद र प्रतिष्ठाका लागि नभई सेवा, उत्तरदायित्व, जवाफदेहिता र नयाँ राजनीतिक संस्कार निर्माणका वर्ष हुने उनको प्रतिबद्धता छ।
उनले अन्त्यमा आफूलाई विश्वास गर्ने सम्पूर्ण मतदाता, राष्ट्रिय स्वतन्त्र पार्टीका कार्यकर्ता, शुभेच्छुक तथा सहयोगीहरूप्रति कृतज्ञता व्यक्त गर्दै आगामी यात्रामा साथ, सुझाव र मार्गदर्शनको अपेक्षा गरेका छन्।