मध्यविन्दुमा आगलागी : पीडितको घाउमा मलहम लगाउन पुगे तिलक महत

नवलपुर । नवलपुरको मध्यविन्दु नगरपालिका–१४, चरङ्गेमा सोमबार साँझ भएको आगलागीबाट प्रभावित परिवारलाई भेट्न नेकपा एमालेका केन्द्रीय सदस्य तथा पूर्व सांसद तिलक महत घटनास्थल पुग्नुभएको छ।
पहाडी भूभागमा रहेको चरङ्गेमा भएको आगलागीबाट दुईवटा घर र गोठ पूर्ण रूपमा जलेर नष्ट भएका छन्। आगलागीमा चौपाया तथा कुखुरा समेत जलेका छन् भने एक जना घाइते भएका छन्।

पीडित परिवारलाई भेट्दै महतले हौसला र आत्मबल प्रदान गर्नुभएको थियो। उहाँले भन्नुभयो, “यो घटनाले यहाँहरू मात्र होइन, मलाई पनि दुःखी बनाएको छ। टोलछिमेक सबैलाई दुखी बनाएको छ, तपाईंहरुको दुखः पनि हाम्रो दुखः हो । हरेक सुख–दुःखमा हामी सधैं तपाईँहरूसँगै छौं, नगरपालिका पनि साथमै छ, पुर्नस्थापनाको पहल हुन्छ ।”

यसै क्रममा महतले आगलागीमा घाइते भएका कर्णबहादुर पेमीलाई मध्यविन्दु नगर अस्पताल पुगेर भेट्नुभएको थियो। उहाँले घाइतेको स्वास्थ्य अवस्थाबारे जानकारी लिँदै शीघ्र स्वास्थ्य लाभको कामना गर्नुभएको छ। सोमबार साँझ भएको आगलागीबाट हरिसरा पेमीको ढुङ्गा–माटोले बनेको जस्ताको छानो भएको दुईतले घर, गोठ र खोर पूर्ण रूपमा जलेर नष्ट भएको छ। घरभित्र रहेका अन्नपात, लत्ताकपडा तथा भाँडावर्तन पनि जलेका छन्। साथै २ भैंसी, १ हल गोरु, ७ बाख्रा र २५ कुखुरा जलेर मरेका छन्।
त्यस्तै, देवबहादुर पेमीको फुसको छानो भएको एकतले घर र गोठ पनि पूर्ण रूपमा जलेर नष्ट भएको छ। घरभित्रका सामग्रीसहित १ लैनो भैंसी, १ पाडो, ७ बाख्रा र ८ कुखुरा जलेर नष्ट भएका छन्।