अतिक्रमित सरकारी तथा सार्वजनिक जग्गाको विवरण पठाउन नवलपुर जिल्ला प्रशासनको निर्देशन

कावासोती । जिल्ला प्रशासन कार्यालय नवलपरासी (बर्दघाट सुस्ता पूर्व) नवलपुरले जिल्लाभित्र रहेका अतिक्रमित सरकारी तथा सार्वजनिक जग्गाको विवरण तत्काल उपलब्ध गराउन निर्देशन दिएको छ।

गृह मन्त्रालय, सिंहदरबार काठमाडौंको पत्र अनुसार जिल्ला प्रशासन कार्यालयले जिल्लाका सबै सरकारी कार्यालयहरूलाई यस्तो निर्देशन जारी गरेको हो। पत्रमा जिल्लाभित्र रहेका सरकारी तथा सार्वजनिक जग्गाको पहिचान गरी ती जग्गामा भएको अतिक्रमण हटाउने योजना तयार गर्न आवश्यक तथ्यांक संकलन गर्नुपर्ने उल्लेख गरिएको छ।

जिल्ला प्रशासन कार्यालयले सम्बन्धित कार्यालयहरूलाई आफ्नो कार्यक्षेत्रभित्र रहेका सरकारी तथा सार्वजनिक जग्गामा अतिक्रमण भए/नभएको स्पष्ट विवरण संकलन गरी यथाशीघ्र पठाउन आग्रह गरेको छ। साथै, अतिक्रमण भएको अवस्थामा त्यसको अवस्था र हटाउने योजनासहितको विवरण समेत उपलब्ध गराउन भनिएको छ।

प्रशासनले सरकारी सम्पत्तिको संरक्षण तथा व्यवस्थापनलाई प्रभावकारी बनाउन यस्तो कदम चालिएको जनाएको छ।