नेपाल मानव अधिकार वर्ष पुस्तकको पूर्व अर्धवार्षिक समीक्षा

कावासोती । अनौचारिक क्षेत्र सेवा केन्द्र (इन्सेक) नवलपरासी (बर्दघाट सुस्ता पूर्व) को आयोजनामा नेपाल मानव अधिकार वर्ष पुस्तक २०२० को अर्धवार्षिक समीक्षा कार्यक्रम असार ९ गते सम्पन्न भएको छ ।
कार्यक्रममा इन्सेक जिल्ला प्रतिनिधि तिर्थराज डुम्रेले सन् २०१९को जनवरीदेखि हाल सम्म जिल्लामा संकलन गरिएको घटनाको बारेमा जानकरी गराएका थिए । उनले सन् २०१९ मा हाल सम्म २९ वटा घटना फारम संकलन गरिएको जानकारी दिए । जसमा नागरिक तथा राजनितिक अधिकारका ८ वटा, बाल अधिकारका ५ वटा महिला विरुद्ध हुने सबै खाले हिंसामा ५ वटा बलात्कार र यौन दुव्र्यवहार तथा ५ वटा महिला हिंसा सम्बन्धि घटना गरि १० वटा, सम्पत्तिमा क्षतिको ५ वटा र मानव वेचविखन सम्बन्धि १ वटा घटना रहेको जानकारी दिए ।
कार्यक्रममा बोल्दै जिल्ला प्रशासन कार्यालय नवलपरासी (बर्दघाट सुस्ता पूर्व)का प्रमुख जिल्ला अधिकारी बिष्णु कुमार कार्कीले मानव अधिकार रक्षाको लागि सवै पक्ष उत्तिकै जिम्मेवार बन्न पर्ने बताए । महिला हिंसा र बाल अधिकार सम्बन्धि घटनाहरुमा समेत मिलापत्रका गर्ने प्रवृतिको कारण घटनामा झन बृद्धि भएको उनले बताए । यस्ता घटनामा मेलमिलाप नभई कानुनी कारवाही हुनुपर्ने उनले बताए ।
उनले मानव वेचविखनको प्रवृत्तिमा परिवर्तन आएको भन्दै मानव वेचविखनलाई वैदशिक रोजगारीका सवालहरुलाई पनि प्राथमिकता र निगरानि गर्न इन्सेकलाई सुझाव दिए ।
कार्यक्रममा जिल्ला प्रहरी कार्यालय नवलपरासी (बर्दघाट सुस्ता पूर्व)का डिएसपी अर्जुन रानाभाटले प्रहरी र नागरिकको सहकार्यमा नै मानव अधिकार हनन्का घटना न्यूनिकरण गर्न सकिने बताए । प्रहरी सदैव मानव अधिकार रक्षाको लागि क्रियाशिल रहेको भन्दै सरोकारवालाहरुको सहकार्यमा नै अगाडी बढ्ने उनको भनाई थियो ।
कार्यक्रममा जिल्लाका विभिन्न संघसंस्थाका प्रतिनिधि र पत्रकारहरुको सहभागिता रहेको थियो ।