नवलपुरमा  धान उत्पादनमा कमि हुने

कावासोती । पूर्बि नवलपरासी (नवलपुरमा) यो वर्ष धान उत्पादनमा कमि आउने अनुमान गरिएको छ । कृषि ज्ञान केन्द्र तनँहुको अनुसार नवलपुर जिल्लामा अहिले करिब २ सय हेक्टर क्षेत्रमा लगाईएको गरिमा जातको धानमा बाला नलागेको कारण धान उत्पादनमा कमि आउने जनाएको छ । नवलपुरमा सबै भन्दा बढि प्रभाव गरिमा जातको धानमा बाला नलाग्दा गत वर्षको तुलनामा १० देखि १५ प्रतिशत सम्म धान उत्पादनमा कमि आउने कृषि ज्ञान केन्द्र तनँहुका कृषि प्रसार अधिकृत मोहन श्रेष्ठले बताएका छन् ।
धान उत्पादनका लागि नवलपुर उपयुक्त क्षेत्र भए पनि यो वर्ष भने धान उत्पादनमा कमि आउने भएको हो । धान बाली उत्पादनका लागि अनुकुल मौसम नपरेका कारण यस वर्ष धान उत्पादनमा कमी आउने कृषि विज्ञहरुले जनाएका छन् । जिल्लामा परेको लामो समयसम्मको खडेरी र दोस्रो पटक राख्नुपर्ने रसाईनिक मल राख्न नपाएका कारण यस वर्ष जिल्लामा धान उत्पादनमा गिरावट आउने संकेत देखिएको कृषकहरुले बताएका छन् । यस क्षेत्रको धानमा किरा लागेको, गँवारो किरा, पातको थोप्ले रोगको समस्या लगायतका कारणले पनि विगतका वर्षको तुलनामा १० देखि १५ प्रतिशत सम्म धान उत्पादनमा ह्रास आउने संकेत देखिएको हो ।
जिल्लामा धान उत्पादनको पकड क्षेत्र मानिएको कावासोती , मध्यबिन्दु , देबचुली , गैडाकोट र दुम्किबास लगायतका क्षेत्रमा दोस्रो पटक राख्नुपर्ने मल राख्न नपाइएकाले त्यती राम्रो धान नफलेको कृषकहरुको भनाइ छ । पछिल्लो समयमा खेतीयोग्य जमिन प्लटिङ् गर्ने प्रवृत्ति बढेकाले क्षेत्रफल घट्दै गएकाले यसले उत्पादनमा पनि प्रत्यक्ष असर पार्ने उनीहरु बताउँछन् । त्यस्तै खेतीयोग्य जमिनमा गरिएको माछापालन, पछिल्लो समयमा बढेको तरकारी खेती प्रतीको आकर्षण लगायतका कारणले विगतका वर्षको तुलनामा उत्पादन क्षेत्र घट्दै गएको देखिएको छ ।
नवलपुर जिल्लामा गत वर्ष १८ हजार ९ सय ७४ हेक्टर क्षेत्रफलमा धान खेति गरेकोमा ८१ हजार ५ सय ७० मेट्रिक टन धान उत्पादन भएको कृषि ज्ञान केन्द्र तनँहुका कृषि प्रसार अधिकृत मोहन श्रेष्ठले बताएका छन् । तर यो वर्ष नवलपुर जिल्लाका किसानहरुले गरिमा जातको धान बढि मात्रामा लगाएको कारण गत वर्षको तुलनामा धान उत्पादनमा कमि आउने कृषि ज्ञान केन्द्र तनँहुका कृषि प्रसार अधिकृत श्रेष्ठले बताएका छन् ।