मानव अधिकार सबैको साझा सवाल – अध्यक्ष जिसी

कावासोती, २४ कात्तिक । विनयी त्रिवेणी गाउँपालिकाका अध्यक्ष डम्बर बहादुर जिसीले मानव अधिकार सबैको चासोको बिषय र साझा सवाल भएको बताएका छन् ।

अनौपचारिक क्षेत्र सेवा केन्द्र (इन्सेक) नवलपरासी (बर्दघाट सुस्ता पूर्व) को आयोजनामा विनयी त्रिवेणी गाउँपालिकामा कात्तिक २४ गते सम्पन्न मानव अधिकार संरक्षण र सम्बद्र्धनका लागि राज्यको जबाफदेहिता तथा जनताको सहभागिता अभिबृद्धि सम्बन्धी परियोजनाको परिचयात्मक तथा मानव अधिकार समूह गठन कार्यक्रममा बोल्दै अध्यक्ष जिसीले सो कुरा बताएका हुन् ।

उनले मानव अधिकार सबैको चासोको बिषय र साझा सवाल भएको भन्दै स्थानीय तहमा मानव अधिकारको प्रत्याभूति र त्यसको कार्यान्वयनको लागि सदैव क्रियाशिल रहने प्रतिबद्धता जनाए । स्थानीय तहसंगको समन्वयमा सञ्चालन हुन थालेको परियोजनामा गाउँपालिकाको पुर्ण सहयोग हुने अध्यक्ष जिसीले बताए ।

गाउँपालिकाकी उपाध्यक्ष मिनाकुमारी राना ले शिक्षा, स्वास्थ्य, खाध्य र आभावको अधिकारसंगै दलित, अपल्पसंख्यक, जनजाति, महिला र बालबालिकाको सवाललाई समेत परियोजना मार्फतसंगै अगाडी बढाउन आग्रह गरिन् । उनले गाउँपालिकामा बढ्दो बालबिबाह रोक्नको लागि गाउँपालिकाले ठोस कार्यक्रम सञ्चालन गर्न लागेको भन्दै इन्सेकलाई समेत आवश्यक समन्वय र सहयोगका साथ अगाडी बढ्न अनुरोध गरिन् ।

कार्यक्रममा इन्सेक गण्डकी प्रदेश संयोजक शिव खकुरेलले संविधानले व्यवस्था गरेको मौलिक हकका धाराहरुलाई पालना गर्न सके मानव अधिकारको पालना हुने भन्दै अधिकार र कर्तव्यलाई संगै बढाउन आवश्यक रहेको बताए । उनले इन्सेकले बिगतदेखि हाल सम्म गर्दै आएको गतिविधिबारे जानकारी दिएका थिए ।

त्यस्तै कार्यक्रममा परियोजनाकी गण्डकी प्रदेश संयोजक सवनम शर्माले परियोजनाबारे कार्यक्रममा जानकारी गराएकी थिइन् । उनले तिन वर्ष अवधिमा सञ्चालन गरिने कार्यक्रमबारे सहभागीलाई अभिमुखिकरण गरेकी थिइन् ।

कार्यक्रममा १३ सदस्यीय मानव अधिकार समूह समेत गठन गरिएको छ । समूहको संयोजकमा धर्म बहादुर जिसी, सदस्यहरुमा शान्ती खड्का, सभ्यता हमाल, गोविन्द श्रेष्ठ, सूर्य बहादुर कुमाल, जमिर अन्सारी, नमिमाया पुन, दिपक विश्वकर्मा, रेणु सुनार, भुना पंगेनी, लक्ष्मी पुलामी र तेज प्रसाद कोइराला रहेका छन् ।