नवलपुरमा क्षमताभन्दा बढि विद्यार्थी बोक्ने सवारीलाई कारवाहि हुन्छ : ट्राफिक प्रमुख थापा

ज्ञानु पंगेनी
कावासाेति । जिल्ला ट्राफिक प्रहरी कार्यालय नवलपरासी पूर्व (नवलपुर ) का प्रहरी प्रमुख (प्रहरी निरीक्षक) मुनेन्द्र थापाले सिट क्षमताभन्दा बढि विद्यार्थी बोक्ने परिपाटीको अन्त्य गर्ने बताएका छन् ।

एक हप्ता अघि मात्रै सरुवा भएर नवलपुरमा आएका प्रहरी निरीक्षक थापाले विहिबार कावासोतीमा आयोजना गरिएको पत्रकार भेटघाट तथा परिचयात्मक कार्यक्रममा बोल्दै नवलपुर क्षेत्रका विद्यालयका बसहरुले साना–साना बालबालिकाहरुलाई पनि उभ्याएर यात्रा गराइरहेको पाएकाले त्यसलाई रोक्न अभियान संचालन गर्ने बताए । ‘ म आएको एक हप्ता भयो मैले यहाँको माहोल बुझ्दा विद्यालयका बसहरुले लापरवाहि गरेको पाए । त्यसैले छिट्टै विद्यालयका संचालकहरुलाई बोलाएर छलफल गर्दैछु । ’ थापाले भने – ‘ यात्रु बोक्ने सवारीमा पनि विद्यार्थी बोकेको छ । सिटभन्दा बढि विद्यार्थी बोकेको छ । विद्यालय मात्र होइन् मन्टेश्वरीका सवारीमा पनि यो समस्या छ , त्यसलाई म छिट्टै रोक्छु । छलफल गरेपछि पनि मनपरी गरे कारवाहि हुन्छ । ’
प्रहरी निरीक्षक थापाले सवारी दुर्घटनाको प्रमुख कारण चालक नै भनेर गाली गलौज गरिरहदा दुर्घटना कम गर्न यात्रुको पनि उत्तिकै जिम्मेवारी हुने बताए । ‘यदि चालकले मदिरा सेवन गरेको देखेमा सेवन गर्न रोक्ने , तिब्र गतिमा सवारी चलाएमा गति कम गर्न लगाउने दायित्व यात्रुको पनि हो । तर , यात्रुले यस्ता कुरामा वास्ता गर्दैनन् । यस्ता कुरामा यात्रुले चासो दिने हो भने दुर्घटना न्युनिकरणमा ठूलो सहयोग पुग्छ । ’ थापाले भने ।
अब चालकलाई मात्र नभइ यात्रुलाई पनि दुर्घटना न्युनिकरण गर्न सचेत बनाउन आवश्यक रहेकाले छिट्टै अभियान थाल्ने प्रहरी निरीक्षक थापाले बताए ।

ट्राफिक प्रहरीभित्र पनि आन्तरीक सुद्धिकरण र सुदृढिकरण आवश्यक रहेको भन्दै थापाले आफु कार्यलयमा हाजिर भए लगत्तै उक्त कामको सुरुवात गरेको जानकारी दिए । ‘ट्राफिक प्रहरी स्मार्ट हुनुपर्छ भन्ने मेरो मान्यता छ , झुत्रेझाम्रे भएर कार्यस्थलमा बस्ने होईन् मान्छे पनि टिपटप हुनुपर्छ अनि काम पनि छिटो छरीतो हुनुपर्छ भनि त्यसै अनुसार निर्देशन गरिसकेको छु । ’

कार्यक्रममा नवलपुर जिल्लाका विभिन्न संचार माध्यममा आबद्ध पत्रकारहरुको सहभागीता रहेको थियो । सहभागी भएका पत्रकारहरुले नवलपुर जिल्लामा दुर्घटना न्युनिकरण गर्न एकदमै आवश्यक रहेको भन्दै सल्लाहा सुझाव राखेका थिए ।
नेपाल पत्रकार महासंघ नवलपुरका अध्यक्ष होमराज रानाभाटले गण्डकी प्रदेशकै बढि दुर्घटना हुने जिल्लाका रुपमा नवलपुर चिनिएकाले यसलाई कम गर्न ठोस् योजना बनाएर अघि बढ्नुपर्ने बताए । मुख्य राजमार्गमा मात्र नभइ पहाडी क्षेत्रका सडकहरुमा पनि जाँच गर्ने , सचेतना जगाउने काम गर्न उनले सुझाव दिए । दाउन्ने पहाडमा विग्रेर रोकिएका सवारीका कारण पनि दुर्घटना बढि हुने गरेकाले विग्रेका सवारीलाई तुरुन्तै पन्छाउने व्यवस्था गर्न आवश्यक रहेकोमा सहभागी संचारकर्मीहरुको सुझाव थियो ।