सहकारीको एक करोड रकम बेरुजु / नौ सय शेयर सदस्यको रकम जोखिममा

दयाराम आचार्य/ज्ञानु पंगेनी
कावासोती । पूर्बि नवलपरासीको हुप्सकोट गाउँपालिकामा रहेको हजुरको बचत तथा ऋण सहकारी संस्थाको व्यवस्थापकका नाममा रु. एक करोड बढी बेरुजु देखिएको छ । सहकारीका ब्यवस्थापक देवि सोतीको नाममा यती ठूलोमात्रामा रकम बेरुजु देखिएपछी संस्थाका शेयर सदस्यको रकमनै जोखिममा परेको छ । सहकारीमा आर्थिक वर्ष २०७४/०७५को अन्त्य सम्ममा कुल ८ सय ३१ जना शेयर सदस्य रहेका छन् । हाल करिब नौ सयको हाराहारीमा सदस्य रहेको यस सहकारीको आर्थिक वर्ष २०७४/०७५ को लेखा परिक्षण प्रतिवेदनमा रु.७० लाख ७४ हजार १२२ बेरुजु देखिएको छ । सस्थाका कतिपय सदस्यले सहकारीमा आर्थिक अपचलन भएको बताउदै आएका छन् ।
सहकारीलाई व्यवस्थित नगरी आर्थिक हिनामिना भएकाले यो रकम बेरुजु देखिएको हो । ‘लेखा परिक्षण प्रतिवेदनमा २०७५ असार मसान्तमा देखिएको बाँकी नगद रु. ७० लाख ७४ हजार १२२ मध्य व्यवस्थापक देवी सोती जिम्मा पाइयो भने बैंक बौज्दात अनुसूचीमा उल्लेख गरिएको छ ’ भनी टिप्पणी उठाईएको छ । सहकारीका हालका अध्यक्ष पे्रम बहादुर थापाको अध्यक्षतामा २०७६ भदौ ३१ गते बसेको बैठकले संस्थामा देखिएको हिसाब मिलान गर्ने क्रममा बेरुजु रकम बराबरको अचल सम्पतीबाट व्यवस्थापक देवी सोतीको नाममा रहेको धितो संस्थाको नाममा रहने भन्ने निर्णय समेत गरेको छ । त्यसपछी पनि कुनै कार्य नभएपछी २०७६ साल असोज ५ गतेका दिन ऋण उपसमितिका संयोजक महेन्द्र बस्यालको अध्यक्षतामा बैठक बसी पुनः व्यवस्थापक देवी सोतीको एकाघर परिवारमा रहेको जग्गा धितो मुल्याङ्कन गरि रोक्का प्रक्रियामा जाने निर्णय गरेको छ । यो बैठकले लेखापरिक्षणको प्रतिवेदनमा देखिएको भन्दा धेरै रकम बेरुजु रहेको देखाएको छ । असार मसान्तमा झण्डै ७१ लाख बेरुजु देखिएकोमा ऋण समितिले रु. १ करोड ५ लाख बेरुजु देखाएको छ । संस्थामा यती ठूलो रकम बेरुजु देखिदा शेयर सदस्यको बचत रकमनै जोखिममा पर्ने सक्ने देखिएको छ ।
यस विषयमा सहकारीमा आर्थिक हिनामिना भएको भनि अख्तियारमा समेत पत्र पठाईएको छ ।  प्रदेश र केन्द्र सम्म सहकारी हेर्ने बिभागमा पत्रपठाईएको बताईएको छ ।

सहकारीका अध्यक्ष पे्रम बहादुर थापाले यस बिषयमा छानबिनका लागि समिती निर्माण गरि छानबिन गर्नेकाम भई रहेको र छानबिनको प्रतिवेदनबाट यथार्त आउने बताए । २०७० सालदेखीनै बेरुजु देखिएको र आफु आएपछी यसको छानबिन अगाडी बढाएको बताए । रेमिटको कारोबारले गर्दा यस्तो भएको अनुमान गरि छानविन समिति गठन गरी सहकारीले रेमिट कारोबार गरेका संस्थामा पनि पुगेकाले केही दिनमा प्रतिवेदन आउने उनले बताए । अहिल्लै यस्तो भएको भनेर भन्न नसकिने र केही दिन प्रतिवेदन कुर्नुपर्ने उनले बताए । सहकारीमा ठूलो रकम बेरुजु देखिएपछी यस बर्षको साधारण सभा समेत हुन सकेको छैन् । यस वर्षको लेखा परिक्षण प्रतिवेदन समेत तयार हुन नसक्दा साधारण सभानै रोकिएको छ । प्रतिवेदनमा बेरुजु रकम देखिने भएपछी लेखा परिक्षण प्रतिवेदननै तयार नगरिएको श्रोतले बताएको छ ।
व्यवस्थापक देवी सोतीले सहकारीले रेमिटको काम समेत गर्दै आएकाले कतिपय रेमिटको दाखिला छुट्दा यस्तो भएको बताइृन् । आफुले कुनै आर्थिक हिनामिना नगरेको तर हिसाब राख्न आफुले समेत नजानेर यस्तो त्रुटी भएको उनले बताईन् । उनले कतिपय बिल भौचर धमिराले खाएकाले समेत नभेटिदा समस्या भएको व्यवस्थापक सोतीले बताईन् । यस बिषयमा छानविन समिती समेत बनाईएको भएपनी अझै कुनै प्रगति हुन सकेको छैन् । बेरुजु देखिएको रकमको बास्तवीकता समेत अझै पत्ता लाग्न नसक्दा सहकारीनै समस्यामा पर्ने देखिएको छ । यसले सहकारीमा आवद्ध सदस्यहरुको रकम जोखिममा परेको छ ।

नमुना सन्देशमा समाचार छ