कावासोतीको हिँउदे नगरसभा : रिङ्गरोड निर्माण प्राथमिकतामा, पार्किङ्ग व्यवस्थित बनाउन जोड

दयाराम आचार्य

कावासोती । कावासोती नगरपालिकाले रिङ्गरोड निर्माणलाई प्राथमिकता दिएको छ । नगरपालिकाको सोमबार भएको हिउदे नगरसभाले संसोधित विनियोजन ऐनले रिङ्गरोड निर्माणलाई प्राथमिकता दिदै बजेट विनियोजन गरेको छ । नगर उप प्रमुख प्रेम शङ्कर मर्दनिया थारुले सभामा प्रस्तुत गर्नुभएको विनियोजन ऐनमा नगरपालिकाले रिङ्गरोडलाई प्राथमिकता दिदै रु ५ करोड बजेट विनियोजन गरेको छ । नगरपालिकाको महत्वपूर्ण योजनाको रुपमा हेरिएको रिङ्गरोडलाई सम्पन्न गर्नकालागि वजेट विनियोजन गरिएको छ । नगरपालिकाको विकाशको आधारका रुपमा हेरिएको रिङ्गरोड कावासोती नगरपालिका ४ बाट निर्माणको काम यस अघिनै सञ्चालन गरिएको भएपनी कार्यले गति लिन सकेको थिएन । हिउदे अधिवेशनले वजेट संसोधन गर्दै रिङ्गरोडलाई प्राथमिकतामा पारेको नगर प्रमुख चन्द्र कुमारी पुनले बताउनुभयो । आफ्नो कार्यकालमानै रिङ्गरोड निर्माणलाई सम्पन्न गर्ने गरी कार्यसमेत अगाडि बढाइने उहाले बताउनुभयो । हिउदे अधिवेशनको सभाले पारित गरेको विनियोजन ऐनमा पाच वटा वडाबाट काम गर्ने गरी रु. ५ करोड विनियोजन गरिएको छ । कावासोती नगरपालिका वडा नम्बर १,३,११, १५ र १७ नम्बरवडामा यसै वर्ष रिङ्गरोडको निर्माण हुनेछ । नगरपालिकाले यस अघिनै रिङ्गरोड निर्माण गर्ने गरी डिपिआर समेत तयार गरिसकेको छ । सोही अनुसार अब भने एकै साथ पा“चवटा वडामा काम शुरु हुने भएको छ । यसै गरी सभाले कावासोती १६ गैडाचोक देखि दक्षिण तर्फको बाटोका लागि रु. ३० लाख वजेट थप गरेको छ । यस अघि रु. १ करोड रकम विनियोजन गरिएको थियो । नाला सहितको बाटो स्तोरन्तीका लागि रकम थप गरिएको छ । यस्तै मध्यविन्दु जिल्ला अस्पतालका लागि एम्बुलेन्स खरिदकालागि रु. ७ लाख अनुदान दिने, कुमारवर्ती बहुमुखी क्याम्पमा शौचालय निर्माणका लागि समेत वजेट विनियोजन गरिएको छ । यस अघि रु. ८८ करोड २६ लाख ७० हजार प्रस्तावित वजेट रहेकोमा सभाले संसोधित बजेट रु. १ अर्ब ११ करोड ७४ लाख ९४ हजार ३५१ पारित गरेको नगरपालिका प्रमुख प्रशासकीय अधिकृत रोशन ज्ञवालीले बताउनुभयो ।

सोमबार बसेको सभाले आर्थिक ऐन २०७६मा समेत केही शंशोधन गरी पारित सर्वसम्मतले पारित गरेको छ । जसमा केही छुट भएका व्यवसाय तथा सिफारीसको कर निर्धारण गरिएको छ । आर्थिक ऐनले निजि पार्किङ्गलाई व्यवस्थित बनाउन शुल्क समेत निर्धारण गरेको छ । पार्किङ्गलाई व्यवस्थित बनाउन आर्थिक ऐनले विशेष जोड दिएको छ । वेसमेण्ट पार्किङ्ग निर्माण गर्नेलाई घरनक्शा पास दस्तुरमा छुट दिने समेत निर्णय गरेको छ । सभामा बोल्ने सदस्यहरुले दिवा खाजाको रकम बढाउनुपर्ने, लागत सहभागिता नबुझाउनेलाई सेवा प्रदान गर्नरोक्नुपर्ने लगाएतका विषयहरू उठाएका थिए । सभामा उठेका विषयको उप प्रमुख प्रेम शङ्कर मर्दनिया थारुले जवाफ दिनुभएको थियो । सभामा नगर उप प्रमुख प्रेम शङ्कर मर्दनियाले पेश गर्नुभएको आर्थिक ऐनको शंशोधन प्रस्ताव र विनियोजन ऐनको शंशोधन प्रस्ताव सर्वसम्मले पारित गरेको छ । सभाका बहुमत सदस्यले ध्वनिमतको आधारमा सर्वसम्मत रुपमा शंशोधित प्रस्ताव पारित गरेका थिए ।