अहेबलाई निलम्बन गरी कार्वाही प्रकृया अगाडि बढाउन माग

कावासोती । जवरजस्ती करणी अभियोगमा पक्राउ परेका अहेबलाई निलम्ब गरी कार्वाही प्रकृया अगाडि बढाउन माग गर्दै महिला समूहले जिल्ला प्रहरी कार्यालय र प्रशासन कार्यालयमा ध्यानाकर्षण पत्र बुझाएका छन् । महिला समूहले र्याली सहित पक्राउ परेका नवलपुर बुलिङ्गटार गाउँपालिका –४ अर्खला स्वास्थ्य चौङ्कीमा कार्यरत छैठौ तहका अहेव टोक बहादुर सुस्लिङलाई निलम्बन गरी कार्वाही प्रकृया अगाडि बढाउन माग गरेका हुन् । जनज्योति महिला समूह, सूर्यमुखी महिला समूह,मिलिजुली महिला समूह बुलिङ्गटारका महिलाहरू सहित अन्य महिला अधिकारकर्मीहरुको टोलीले प्रहरी र जिल्ला प्रशासन अगाडि धर्ना सहित कार्वाहीको माग गरेका हुन् । पीडित परिवारलाई मुद्धा फिर्ता लिन दवाव दिने तथा गरीबले मुद्धा लड्न सक्दैन भन्दै पीडकका पक्षहरुले समेत धम्काउने गरेकाले यस्तो कार्य वन्द गराउन प्रशासनसँग माग गरिएको छ । विगतका समयमा समेत निज टोक बहादुर सुस्लिङले महिला माथि हिंसा गर्ने तथा बलात्कारको प्रयास समेत गर्ने गरेकोमा स्थानीय स्तरमा दवाव सृजना गरी मिलापत्र गराउन बाध्य बनाउने गरेको भन्दै अहिलेको घटनामा समेत समेत शक्ति र पैसाको धाक धम्की समेत दिदै त्रासको वातावरण सृजना समेत गरेकाले पीडित परिवारको सुरक्षाको लागि समेत महिला समूहले माग गरेका छन् । माघ २ गते साँझ ४० वर्षीय महिलालाई जवरजस्ती करणी (बलात्कार) गरेको आरोपमा प्रहरीमा जाहेरी दर्ता भएको छ । सुस्लिङ अहिले प्रहरी नियन्त्रणमा रहेका छन् । तर आवश्यक कार्वाही प्रकृया अगाडि नबढाइएको भन्दै महिला समूहले कार्वाहीका लागि दवाव दिएका छन् । उनीहरुले कुनै पनि बहानामा दोषीलाई उम्काउन खोजेमा कडा सङ्घर्षका कार्यक्रम गर्ने जनाएका छन् ।