दयाराम आचार्य  कावासोती । बन्दाबन्दीको समयमा दैनिक ज्याला मजदुरी गरेर गुजारा चलाउदै आएकाहरुलाई छाक टार्न समस्या भएपछि नवलपुरका विभिन्न स्थानीय तहले राहत वितरणलाई प्राथमिकता दिए । बन्दाबन्दीको शुरुको चरणमा राहत वितरणमा केन्द्रित भएका यहाँका स्थानीय तह अहिले भने विपन्नलाई रोजगार प्रदान गर्न तर्फ लागेका छन् । विपन्नलाई राहतभन्दा रोजगार प्रदान गर्दा छाक पनि टर्ने स्थानीय तहका काम समेत हुने भएपछि अहिले स्थानीय तहहरू यस तर्फ केन्द्रित भएका हुन् ।
स्थानीय तहका विभिन्न साना योजना,बाटो,नाला,कुलो निर्माण,पदमार्ग निर्माण जस्ता काममा बन्दाबन्दीका कारण प्रभावित बनेकाहरुलाई रोजगार प्रदान गर्न स्थानीय तह लागि परेका छन् । विशेष गरेर प्रधामन्त्री रोजगार कार्यक्रम मार्फत विपन्नलाई रोजगारमा समावेश गराउन तर्फ लागिएको छ । नवलपरासी पूर्व नवलपुरको हुप्सेकोट गाउँपालिकाले बन्दाबन्दीमा प्रभावित बनेका दैनिक ज्याला मजदुरी गरेर जीविकोपार्जन गर्दै आएकाहरुलाई राहतको साटो रोजगार प्रदान गर्न लागेको छ । गाउँपालिकाले प्रधानमन्त्री रोजगार कार्यक्रममा सूचिकृत भएका ४ सय ४५ जनालाई आवश्यकता अनुसार रोजगार कार्यक्रममा समावेश गर्न लागेको हो । बन्दाबन्दीले प्रभावित भएका दैनिक ज्याला मजदुरी गरेर गुजारा चलाउदै आएकाहरुलाई प्राथमिकतामा राखि राहतको सट्टा रोजगार प्रदान गर्न लागिएको हुप्सेकोट गाउँपालिकाका प्रमुख प्रशासकीय अधिकृत कृष्ण सापकोटाले बताउनुभयो । ‘हामीले बन्दाबन्दीमा प्रभावितहरुलाई राहतको सट्टा रोजगार प्रदान गर्न लागेका छौ’ प्रमुख प्रशासकीय अधिकृत सापकोटाले भन्नुभयो–यसले काम पनि हुने र बन्दाबन्दीले प्रभावित विपन्नलाई राहत समेत हुने छ ।
हुप्सेकोट गाउँपालिकाले प्रधानमन्त्री रोजगार कार्यक्रम अन्र्तगतको रकमबाट पूर्व पश्चिम राजमार्गको डण्डा देखी झारेभञ्ज्याङ्गसम्मको सडकलाई बाह्रै महिना सञ्चालन हुने बनाउन लागेको छ । यस सडक खण्डमा रहेका विभिन्न जोखिम युक्त मोडहरुको समेत सुधार गरी बाटोको स्तरउन्नति गरिने प्रमुख प्रशासकीय अधिकृत सापकोटाले बताउनुभयो । पहाडी क्षेत्र भएकाले बाहै्र महिना सडक सञ्चालनमा कठिनाई हुने गरेकाले यस क्षेत्रका बासिन्दाले समस्या खेप्दै आएकोमा प्रधानमन्त्री रोजगार कार्यक्रम अन्र्तगत बाटोको स्तरउन्नति गर्ने,जोखिम युक्त मोडहरू सुधार गर्ने योजना बनाएको उहाँले बताउनुभयो । ‘यो सडकमा बाह्रै महिना गाडी गुड्न सक्ने अवस्था छैन्, विभिन्न स्थानमा जोखिम युक्त मोडहरू छन्, कार्यक्रम मार्फत यसको स्तरोन्नती गरिनेछ ’ प्रमुख प्रशासकीय अधिकृत सापकोटाले भन्नुभयो–यसले पहाडी क्षेत्रका बासिन्दालाई आवतजावतमा सहजता त थप्नेनै छ, मोड सुधारले सम्भावित सडक दुर्घटनालाई समेट घटाउने छ ।
प्रधानमन्त्री रोजगार कार्यक्रम मार्फत डण्डा–झ्यालबास–गुरुङ्गघाट–रातेखोला–दुलुङ्गा –बसेनी –झारेभञ्ज्याङ्ग सडकको काम गर्न लागिएको हो । प्रधानमन्त्री रोजगार कार्यक्रमको रु. २२ लाख ८८ हजार बजेटबाट प्रधानमन्त्री रोजागर प्रणालीमा सूचिकृत भएकालाई कम्तीमा १५ दिन रोजगार प्रदान गर्ने गरी काम शुरु गरिने छ । एक दुई दिनमा काम शुरु गरिने गाउँपालिकाले जनाएको छ ।
योसँगै कावासोती नगरपालिकाले समेत बन्दाबन्दीले प्रभावित भएकालाई प्राथमिकतामा राखि रोजगार प्रदान गरिरहेको प्रधानमन्त्री रोजगार कार्यक्रम कावासोतीका संयोजक मुकुन्द सापकोटाले बताउनुभयो । ‘हामीले बन्दाबन्दीले प्रभावितहरुलाई प्राथमिकतामा राखि रोजगार प्रदान गरिरहेका छौ’ संयोजक सापकोटाले भन्नुभयो–रोजगारले राहतको समेत काम गर्ने छ ।
नवलपुरका अन्य स्थानीय तहहरुले समेत हाल प्रधामन्त्री रोजगार कार्यक्रम मार्फत बन्दाबन्दीले प्रभावित भएकाहरुलाई रोजगार प्रदान गर्ने गरी काम गरिरहेका छन् ।