पिनले बुझायो सम्भावित योजनाहरुको लिखित सुझाव

दयाराम आचार्य                                           कावासोती। प्रोग्रेसिभ इञ्जिनियरिङ एशोसियसन नेपाल (पिन ) नवलपुर कमिटिले कावासोती नगरपालिकामा आगामि आर्थिक वर्षको नीति तथा कार्यक्रममा समावेश गर्न सकिने सम्भावित योजनाहरुको सुझाव पत्र बुझाएको छ । कावासोती नगरपालिका प्रमुख चन्द्र कुमारी पुन समक्ष सम्भावित योजनाहरुको लिखित सुझाव पत्र बुझाएको हो ।
स्थानीय तहका सरकारको बार्षिक नीति तथा कार्यक्रममा सुझावहरू पेश गर्ने निर्णय भए बमोजिम सुझाव पत्र कावासोती नगरपालिका, नवलपुरलाई समेत पेश गरिएको पिन नवलपुरका अध्यक्ष शशिकुमार भुजेलले बताउनुभयो । पिनले कोभीड १९ विरुद्धको अभियान, सडक, यातायात तथा पूर्वाधार विकास, कृषि, सहकारी तथा गरीबी निवारण, संस्कृति, पर्यटन तथा वातावरण संरक्षण, शिक्षा, सूचना तथा प्रविधि क्षेत्र, प्राकृतिक साधन स्रोतको उपयोग एवं सरङ्क्षण, यूवा स्वरोजगार एवं रोजगारी अभिबृद्धिका क्षेत्रलाई समेटर गर्न सकिने सम्भावित योजनाहरुको सुझाव पत्र कावासोती नगरपालिकालाई बुझाएको हो ।

उल्लेखित विभिन्न क्षत्रमा जस्तै बिरामीहरुलाई सहज रुपमा अस्पताल/स्वास्थ्य केन्द्रहरुसम्म आवतजावत गर्न निशुल्क रुपमा एकीकृत एम्बुलेन्स सुविधा उपलब्ध गराउने । नगरपालिका अन्तर्गतका हरेक वडाहरुमा वर्तमान र भविष्यमा समेत महामारी विरुद्ध लडन व्यवस्थित क्वारेण्टाइनहरुको निर्माण गर्ने । नगर तथा वडास्तरमा रहेका स्वास्थ्य चौकिहरुमा केन्द्र तथा प्रदेश सरकारसँग समन्वय गरी आवश्यक भौतिक पूर्वाधार निर्माण गर्ने तथा त्यहाँ आवश्यक जनशक्ति व्यवस्थापन गर्ने र स्वास्थ्य केन्द्रका डाक्टर, नर्स, स्वास्थ्यकर्मीहरुलाई आवश्यक पिपिई व्यवस्था गर्ने । नगर क्षेत्रभित्रका बासिन्दाहरुको सहज यातायात सुविधाको लागि व्यवस्थित नगर बससेवा सञ्चालन गर्ने । नगर यातायात गुरुयोजना तयार गरी सो को आधारमा नगर क्षेत्रमा भएका सडक (सम्भावित अन्य यातायातका पूर्वाधारहरू समेत), भविष्यमा बनाउनु पर्ने सडकको मापदण्ड निर्धारण गरी गुरुयोजनाको प्राथमिकता अनुसार निर्माण तथा स्तरोन्नती गर्दै जाने जस्ता योजना सुझाव पत्रमा समावेश गरिएको छ ।
यसै गरी बाँझिएको जमिनलाई कृषि उत्पादनमा जोड्न कृषकहरुलाई न्यूनतम अनुदान सहयोग सहित प्रोत्साहन गर्ने नीति अबलम्ब गर्न सकिने । कृषि क्षेत्रलाई अति आवश्यक सिञ्चाईको उचित व्यवस्था मिलाउने । भौगोलिक अवस्था हेरि नहर, बोरिङ सिचाई प्रविधि, कुलोद्धारा सिञ्चाई हुन नसक्ने भेगमा स्प्रिङकल, लिफ्ट सिञ्चाई र रेन वाटर हारभेण्टिङको नीति अबलम्बन गर्न सकिने । ग्रामीण क्षेत्रका बस्तीहरुको योजनाबद्ध विकासको लागि “एक घर एक करेसाबारी र एक घर एक फुलबारी” निर्माण गर्ने गरी भवन निर्माण संहिता लागू गर्ने । हरेक वडाहरुमा कृषि चिस्यान एवं कृषि उपज भण्डारण केन्द्रको स्थापना गर्ने । कृषि हाटबजार सञ्चालन गर्ने जस्ता योजनालाई समेत सुझाव पत्रमा समेटिएको छ ।
नगरपालिकाको एकीकृत पर्यटन गुरुयोजना निर्माण गर्ने । नगरपालिकाका विभिन्न वडाहरुमा “एक वडा एक व्यवस्थित पार्क” निर्माणको अभियान सञ्चालन गर्ने । स्थानीय कला र संस्कृति प्रवद्र्धन एवं खेलकुद पूर्वाधारहरुको निर्माण गर्न विशेष कार्यक्रम सञ्चालन गर्ने । स्मार्ट सिटीको प्रमुख आधार डिजिटाइज कावासोती नगरपालिकाको अबधारणा बमोजिम पहिलो चरणमा सम्पूर्ण नागरिकलाई अनलाइन मार्फत न्यूनतम आधारभुत सेवा प्रदान गर्ने ।
केरुङ्गे खोला लगायतका अन्य खोला वाट अव्यवस्थित तरिकाले भइरहेको ढुङ्गा, गिटी र बालुवा उत्खनन्लार्ई नियन्त्रण गर्दै वातावरणीय प्रभावलाई न्यून गर्दै व्यवस्थित एवं पारदर्शी ढङ्गबाट ढुङ्गा, गिटी, बालुवा उत्खनन् गर्ने नीति अबलम्बन गर्ने । नगरपालिका अन्तर्गत नदी तथा खोला किनारा, सार्वजनिक संस्थान, गुठी, सामुदायिक बन, सार्वजनिक बन क्षेत्रलाई उत्पादनमूलक कृषिमा उपयोग गर्ने नीति अबलम्बन गर्ने । स्थानीय सीप, पूँजी र प्रविधिलाई प्रोत्साहन गर्न प्रदेश तथा स्थानीय तहको सहकार्यमा उद्यमशीलता प्रवर्दन केन्द्र स्थापना गरी उद्यमशीलतामा जोड दिने जस्ता सम्भावित योजनालाई सुझाव पत्रमा समावेश गरिएको छ ।
नीति कार्यक्रम तथा योजनाको सुझाव सङ्कलन समिति, नवलपुरका संयोजक ई. विष्णु खनाल, सदस्यहरुमा ई. सागर बस्याल,ई. आशिष मल्ल, राधा गौतम, सुरेश पौडेल सम्मेलित टोलीले नीति सुझाव पत्र तयार पारेको हो ।