स्वस्थ्य म : स्वस्थ्य मेरो परिवार कार्यक्रमको सुरुवात, प्रस्तावित प्राथमिक अस्पतालको निर्माण र व्यवस्थापनमा जोड

दयाराम आचार्य । कावासोती ।
नवलपुरको बौदिकाली गाउँपालिकाले ‘स्वस्थ्य म ः स्वास्थ्य मेरो परिवार’ कार्यक्रम सुरुवात गर्ने भएको छ । आगामि आर्थिक वर्षको नीति तथा कार्यक्रममा यस कार्यक्रम सरुवात गर्ने उल्लेख गरिएको छ । यसकालागि स्वास्थ्य तथा सरसफाई सम्बन्धी आधारभुत पक्षहरुको बारेमा जानकारी प्रदान गर्न विभिन्न कार्यक्रमहरू सञ्चालन गरिने गाउँपालिका प्रमुख प्रशासकीय अधिकृत प्रदिप चन्द्र सुवेदीले बताउनुभयो । यस्तै गाउँपालिकामा प्रस्तावित प्राथमिक अस्पतालको निर्माण र व्यवस्थापनमा समेत जोड दिईएको छ ।
स्वास्थ्य क्षेत्रमा लगानी अभिवृद्धि गर्ने एवं गुणस्तरीय सर्वसुलभ स्वास्थ्य सेवामा समान पहुच स्थापित गर्दै सबैको स्वास्थ्य जीवन प्रत्याभुत गरी दिगो विकास सुनिश्चित गर्नुपर्ने कानूनी दायित्वलाई पुरा गर्ने नीति लिइएको गाउँपालिका अध्यक्ष दुर्गा बहादुर रानाले बताउनुभयो ।
नवजात शिशु मृत्युदर, शिशु मृत्युदर, मातृमृत्युदर र बालमृत्युदरहरुलाई घटाई औषत आयु बढाउन स्वास्थ्य पूर्वाधार,औषधी तथा उपकरणको उपलब्धतामा वृद्धि गर्ने, नसर्ने रोगको प्रकोपको न्यूनिकरणकालागि जोड दिईइको छ ।
स्वास्थ्य सेवामा सर्वव्यापी पहुञ्च वृद्धि गर्नकालागि हरेक वडामा एक एक वटा स्वास्थ्य संस्था स्थापना गर्नकोलागि भवन र जग्गा नभएका वडाहरुमा कम्तीमा चार रोपनी जग्गाको व्यवस्थापन गर्ने, सागै भवन निर्माणको लागि कार्य गरिने,क्षयरोगका बिरामीलाई पोषण भत्ताको व्यवस्थापन गरिने, किशोरकिशोरीहरुलाई दौतरी शिक्षा कार्यक्रम सञ्चालन गर्ने, एचआइभि सङ्क्रमितलाई एआरटी केन्द्रसम्म पुग्न यातायात खर्चको व्यवस्थापन गरिने, जेष्ठ नागरिकको रेखदेख, उपचार र सामाजिक सुरक्षा तथा युवा जनशक्तिको वैदेशिक पलायनको उचित व्यवस्थापनको लागि अध्यन गरी स्थानीय स्तरमै रोजगारीको सिर्जना गरिने नीति तथा कार्यक्रममा उल्लेख गरिएको छ । गाउँपालिकाले ८५ वर्ष उमेर नाघेका जेष्ठ नागरिकहरुलाई सम्मान स्वरुप बार्षिक रुपमा चाडपर्व खर्च उपलब्ध गराउने समेत जनाएको छ ।