अन्तरजिल्ला सुरक्षा समन्वय समितिको बैठक नवलपुरमा

कावासोती ।  पूर्वी नवलपरासी, पश्चिम नवलपरासी र चितवन जिल्लाको अन्तरजिल्ला समन्वय बैठक आज नवलपुरको  मध्यबिन्दु नगरपालिका सभाहलमा  सम्पन्न भएको छ ।
पूर्वी नवलपरासीको प्रमुख जिल्ला अधिकारी मनमाया पंगेनी, पश्चिम नवलपरासीको प्रमुख जिल्ला अधिकारी सागरमणी पाठक, चितवन जिल्लाको प्रमुख जिल्ला अधिकारी नारायणप्रसाद भट्टराई सहित तिन वटै जिल्लाका सुरक्षा निकायका प्रमुखहरुको सहभागिता रहेको थियो ।
बैठकमा तिन जिल्लासंग अन्तरसम्बन्धि शान्ति सुरक्षाको विषयमा छलफल भएको पूर्वी नवलपरासीका प्रमुख जिल्ला अधिकारी मनमाया पंगेनीले बताउनुभयो ।
सिमा जोडिएका यि जिल्लामा हुन सक्ने आपराधिक क्रियाकलापको नियन्त्रणको लागि सबै जिल्लाको सुरक्षा निकाय बिच समन्वय आवश्यक रहेको बैठकमा सहभागिहरुको जोड थियो । यस्तै एक जिल्लामा आपराधिक कार्यमा संलग्न भई आर्को जिल्लामा लुक्न सक्ने हुदाँ यस्ता विषयमा समयमा नै सुचना आदानप्रदान गर्न आवश्यक रहेको बिषयमा छलफल भएको थियो ।
बिशेषगरी यो क्षेत्र लागुऔषधको ट्रान्जिट पोइन्टको रुपमा बिकास हुदै गएको भन्दै पछिल्लो समय सबै पक्षले चासो व्यक्त गर्दै आएका छन् । पूर्वी नवलपरासी जिल्लाको आयोजनामा भएको बैठकमा तिन वटै जिल्लाका प्रहरी प्रमुख, सशस्त्र प्रहरी प्रमुख, राष्ट्रिय अनुसन्धान प्रमुख सहितको सहभागिता रहेको थियो ।