गिट्टी–बालुवा चोरी गर्ने १७ ट्याक्टर प्रहरी नियन्त्रणमा

चोरमारा । इलाका प्रहरी कार्यालय दुम्किबास नवलपरासी (बर्दघाट सुस्ता पूर्व) ले बुधबार राती जिल्लाको विनयी खोलाबाट अवैध रुपमा गिट्टी–बालुवा चोरी निकासी गर्ने १४ ट्याक्टर र तिन वटा ट्रली नियन्त्रणमा लिएको छ । विनयी त्रिवेणी गाउँपालिका–२ मा स्थित विनयी खोलामा अवैध रुपमा नदीजन्य पदार्थ उत्खनन् गरिरहेको अवस्थामा बुधबार राती प्रहरीले १४ वटा ट्रली सहितको ट्याक्टर र थप तिन वटा ट्याक्टरको ट्रली नियन्त्रणमा लिएको इलाका प्रहरी कार्यालय दुम्किबास नवलपरासी (बर्दघाट सुस्ता पूर्व)का इन्स्पेक्टर बिकास बमले बताउनुभयो ।
विनयी खोलामा ठुलो परिमाणमा खोलाजन्य पदार्थ चोरी निकासी भइरहेको सुचनाको आधारमा सो क्षेत्र पुगेको प्रहरी टोलिले ना.७ त ७७१, लु.४ त ३४१६, लु.४ त ५२५६, लु.४ त २२३८, लु.३ त ६३, लु ३ त ८५७६, लु ४ त १८५५, ना. ६ त ९०५८, ना.६ त २५२५, लु.४ त २७२६ को ट्याक्टर नियन्त्रणमा लिएको हो । त्यस्तै नम्बर राख्न बाँकी रहेको नयाँ एक वटा, नम्वर मेटिएको तिन र ट्रयाक्टरको पछाडीको ट्रली तिन गरी जम्मा १७ वटा ट्याक्टर नियन्त्रणमा लिएको बमले बताउनुभयो ।
१४ वटा ट्याक्टर खोलामा अवैध निकासी गर्नका लागि भरिरहेको र थप तिन वटा ट्रली छुट्टै भरिरहेको अवस्थामा प्रहरीले नियन्त्रणमा लिएको हो । केही ट्याक्टरले दुई वटा ट्रलीमा अवैध निकासी समेत गरिरहेको फेला परेको जिल्ला प्रहरी कार्यालय नवलपरासी (बर्दघाट सुस्ता पूर्व)का सुचना अधिकारी डिएसपी मोहन बहादुर खाँणले बताउनुभयो । एक ट्रली खोलामा र एक ट्रली ट्याक्टरमा राखेर अवैध निकासी गरिरहेको समेत पाइएको उहाँले बताउनुभयो । प्रहरीले नियन्त्रणमा लिइएको ति ट्याक्टहरुलाई आवश्यक कारवाहीको लागि विनयीत्रिवेणी गाउँपालिका पठाउने छ ।
अवैध निकासीमा संलग्न ट्याक्टरहरुलाई नियम अनुसार कारवाही गरिने विनयीत्रिवेणी गाउँपालिकाका प्रमुख प्रशासकिय अधिकृत ज्योती कोइरालाले बताउनुभयो । पहिलो पटक नियन्त्रणमा लिएका ट्याक्टरलाई प्रति ट्याक्टर १५ हजार रुपैया जरिवाना लाग्नेछ । त्यस्तै दोस्रो पटक नियन्त्रणमा लिएका ट्याक्टरलाई २५ हजार रुपैया जरिवाना लाग्ने कोइरालाले बताउनुभयो ।
प्रहरी कार्यालयबाट जरिवानाको लागि पत्र प्राप्त भएपछि स्थानीय तहले जरिवाना संकलन गर्नेछ । जरिवाना गाउँपालिकामा जम्मा गरेको भौचरको आधारमा मात्रै नियन्त्रणमा लिएका ट्याक्टर छाडिने इन्स्पेक्टर बमले बताउनुभयो ।
जिल्ला प्रहरी कार्यालय प्रमुखको रुपमा प्रहरी उपरिक्षक एसपी प्रकाश मल्ल आएपछि प्रहरीले जिल्लाको बिभिन्न खोलाहरु हुदै आएको चोरी निकासीलाई नियन्त्रणमा क्रियाशिलता देखाएको छ । यसअघि जिल्लाको विभिन्न स्थानमा रहेका खोलाहरुबाट प्रहरीकै मिलिमतोमा नदीजन्य पदार्थको अवैध निकासी हुदै आएको आरोप लाग्ने गरेको थियो । तर जिल्ला प्रहरी प्रमुखको रुपमा मल्ल आएपछि जिल्लाको बिभिन्न स्थानमा रहेका खोलाहरुबाट हुने अवैध निकासी रोक्न प्रहरीले क्रियाशिलता देखाएको छ ।