दोहन गर्नेबाट १३ लाख २० हजार राजश्व संकलन

तिर्थराज डुम्रे
चोरमारा । नवलपुरको विनयी त्रिवेणी गाउँपालिकाले विभिन्न खोलाहरुबाट अवैधरुपमा गिट्टी, बालुवा निकासी गर्नेबाट जरिवाना स्वरुप साढे दुई महिनामा रु १३ लाख २० हजार राजश्व संकलन गरेको छ । आर्थिक वर्ष २०७७/७८ को पहिलो साढे दुई महिनामा खोला दोहन गर्नेहरुबाट गाउँपालिकाले सो रकम राजश्व संकलन गरेको हो ।
साउन १ गते देखि असोज १५ गते सम्म गाउँपालिकाले विनयी खोलाबाट अवैध रुपमा गिट्टी, बालुवा निकासी गर्ने ८२ वटा ट्याक्टर प्रहरीको सहायतामा पक्राउ गरेको छ । इलाका प्रहरी कार्यालय दुम्कीबासको सहायतामा पक्राउ गरिएका ८२ मध्य नौं वटा ट्याक्टरहरु पटके परेका छन् ।
गाउँपालिकाले पहिलो पटक खोला दोहन गर्ने प्रति ट्याक्टरबाट रु १५ हजारका जरिवाना असुल्छ । दोस्रो पटक पक्राउ गरिएका पटके परेका ट्याक्टरबाट रु २५ हजार जरिवाना असुल्ने गरेको गाउँपालिकाका प्रमुख प्रशासकिय अधिकृत ज्योती अर्यालले बताउनुभयो ।
विनयी त्रिवेणी गाउँपालिकामा रहेको विनयी खोलाबाट अत्याधिक रुपमा गिट्टी, बालुवाको अवैध निकासी हुने गरेको छ । गत बिहिबार मात्रै अवैध रुपमा गिट्टी बालुवा निकासी गरिरहेको अवस्थामा प्रहरीले १४ वटा ट्याक्टर र ३ वटा ट्रली पक्राउ गरेको थियो ।
अवैध निकासी रोक्नका लागि स्थानीय तहले प्रक्राउ गर्न सहायता गर्ने प्रहरीलाई २० प्रतिशत प्रोत्साहन भत्ता उपलब्ध गराउने गरेको छ । यो अवधिमा रु दुई लाख ६४ हजार प्रहरीलाई प्रोत्साहन भत्ता दिएको अर्यालले बताउनुभयो ।
गाउँपालिकाले उपलब्ध गराउने प्रोत्साहन भत्ता आन्तरिक कार्यालय व्यवस्थापनमा खर्च गरिने इलाका प्रहरी कार्यालय दुम्कीबासका प्रहरी निरीक्षक इन्स्पेक्टर बिकास बमले बताउनुभयो । यो अवधिमा गाउँपालिकाबाट प्राप्त प्रोत्साहन भत्ताबाट कार्यालयमा पानीको व्यवस्थापन, आरो निर्माण, खेलकुद सामाग्री सहित खेलकुद पोशाक, कार्यालय परिसर रंगरोगनमा खर्च गरिएको उहाँले बताउनुभयो ।
असार देखि भदौ सम्म खोलाबाट नदी जन्य पदार्थ निकाल्न पाईदैन जसको कारण यो समयमा बढी चोरी निकासी हुने गरेको छ । खोला ठेक्का समयमा नलाग्दा पनि चोरी निकासी बढी हुने गरेको छ । लकडाउनको कारण यो वर्ष खोला ठेक्का प्रक्रियामा केही ढिलाई भएको गाउँपालिकाका प्रमुख प्रशासकिय अधिकृत अर्यालले बताउनुभयो । यस वर्ष खोला ठेक्काको लागि वातावरणीय प्रभाव मुल्यांकनको लागि सुचना आह्वान गर्ने तयारी भइरहेको उहाँले बताउनुभयो । वातावरणीय प्रभाव मुल्यांकन पछि खोला टेण्डर प्रक्रिया शुरु हुने अर्यालले बताउनुभयो ।