हिउँदे अधिवेशनको पहिलो बैठकको एजेण्डा चिकित्सा शिक्षा विधेयक !

२ मंसिर, काठमाडौं । संसदको शिक्षा तथा स्वास्थ्य समितिले चिकित्सा शिक्षा विधेयक संसदको आगामी अधिवेशनको पहिलो बैठकमै पेश गर्ने निर्णय गरेको छ ।

समितिको आइतबार बसेको बैठकले मंसिर ९ गतेबाट दफावार छलफल सुरु गर्ने निर्णय गरेको हो । समिति अन्तरगतको उपसमितिले सरोकारवालाहरुसँग छलफल गरिसकेको छ भने अब संशोधनमाथि दफावार छलफल हुनेछ ।

संसदको हिउँदे अधिवेशनको पहिलो बैठकमै एजेण्डा बनाउने गरी विधेयक तयार गर्ने निर्णय भएको समितिका सदस्य एवं पूर्वस्वास्थ्यमन्त्री गगन थापाले बताए ।

संसदको हिउँदे अधिवेशन माघ पहिलो साता सुरु गर्ने तयारी छ ।

बैठकमा कांग्रेस सांसद थापाले सरकारलाई बोलाएर छलफल गर्नुपर्ने मत राखेका थिए । विधेयक सरकारले नै ल्याएको र डा. गोविन्द केसीसँग पनि सरकारले नै सहमति गरेकाले पहिले सरकारको पोजिसन प्रष्ट पार्नुपर्ने उनको तर्क थियो ।

तर, दफावार छलफल गर्दै जाने निर्णय भएको छ ।

डा. गोविन्द केसीसँग भएको सहमतिअनुसार सत्तारुढ दल नेकपाका प्रमुख सचेतक देव गुरुङले संशोधन दर्ता गरेका छन् । यदि त्यसलाई अगाडि बढाउन सत्तारुढ दल तयार भयो भने अरु संशोधन अस्वीकृत हुने अवसथा आउनेछ ।