वीर अस्पतालकी नर्स बालाजुमा मृत भेटिइन्

वीर अस्पतालमा कार्यरत एक नर्स बालाजुमा मृत अवस्थामा भेटिएकी छन् ।भरतपुर महानगरपालिका-१ घर भएकी २९ वर्षकी अनुमा श्रेष्ठ बालाजुस्थित डा. सुजन ढकालको कोठामा मृत अवस्थामा भेटिएको काठमाडौं प्रहरी परिसरका प्रवक्ता एसपी सीताराम रिजालले जानकारी दिए ।काठमाडौं प्रहरी परिसरको टोली घटनास्थल पुगेको छ । डा. ढकाल काठमाडौंकै एक निजी अस्पतालमा कार्यरत  छन् ।नर्स श्रेष्ठ झुण्डिएको अवस्थामा फेला परेको कोठामा ‘सुसाइड नोट’ पनि भेटिएको प्रहरीले जनाएको छ ।

अनुमा वीर अस्पतालमा कार्यरत आठौं तहकी स्थायी नर्सिङ अधिकृत हुन् । वीर अस्पतालका कार्यकारी निर्देशक डा. सन्तोष पौडेलले पनि अनुमा मृत भेटिएको पुष्टि गरे ।‘शनिबार उनले आत्महत्या गरेको भन्ने सुनिएको छ । हामी प्रहरीसँग मिलेर कानुनी प्रक्रिया पूरा गर्दैछौं’, डा. पौडेलले भने, ‘उनी कोरोना महामारीमा खटिएको एक अब्बल कर्मचारी थिइन ।’पछिल्लो केही समययता उनी मानसिक समस्यामा रहेको र औषधि सेवन तथा मनोसामाजिक परामर्शमा पनि थिइन् ।